نئی دہلی، 4 اپریل (یو این آئی) راجیہ سبھا نے جمعرات کی توسیعی نشست میں دیر رات کو وقف (ترمیمی) بل، 2025 اور مسلمان وقف (منسوخی) بل، 2025 پر بحث مکمل کرنے کے بعد، جمعہ کی علی الصبح اپوزیشن اراکین کی طرف سے پیش کردہ تمام ترامیم کو مسترد کرتے ہوئے دونوں بل کو 95 ووٹوں کے مقابلے 128 ووٹوں سے منظور کرلیا ایوان نے ڈی ایم کے کے تروچی سیوا کی ترمیمی تجویز کو بھی اکثریتی ووٹوں کے ذریعے مسترد کر دیا اس تجویز کے حق میں 92 اور مخالفت میں 125 ووٹ آئے۔
اس کے ساتھ ہی اس بل کو پارلیمنٹ سے منظوری مل گئی۔ لوک سبھا میں اسے پہلے ہی پاس کیا جا چکا ہے، جہاں اس کے حق میں 288 ووٹ پڑے تھے جبکہ 232 اراکین نے اس کی مخالفت کی تھی۔ اپوزیشن جماعتوں کے متعدد ارکان نے بل کے تقریباً ہر آرٹیکل میں ترامیم کی تجویز پیش کی تھی لیکن ایوان نے ان تمام تجاویز کو صوتی ووٹوں سے مسترد کر دیا۔
اقلیتی امور کے وزیر کرن رجیجو نے رات 1:15 بجے بل پر تقریباً 13 گھنٹے طویل بحث کا انتہائی مختصر جواب دیتے ہوئے کہا کہ یہ بل کسی کے مذہبی جذبات کو ٹھیس پہنچانے کے لیے نہیں لایا گیا ہے بلکہ مسلم کمیونٹی کے زیادہ سے زیادہ لوگوں کو فائدہ پہنچانے کے لیے لایا گیا ہے۔ انہوں نے واضح کیا کہ وقف املاک میں کسی قسم کی مداخلت نہیں کی جائے گی۔
انہوں نے کہا کہ حکومت نے مشترکہ پارلیمانی کمیٹی کی سفارشات اور ملک بھر کے دیگر متعلقہ فریقوں کی زیادہ سے زیادہ تجاویز کو بل میں شامل کیا ہے۔ انہوں نے کہا کہ مسودہ بل اور اصل بل کے فارمیٹس کو دیکھ کر بخوبی اندازہ لگایا جا سکتا ہے کہ حکومت نے تمام متعلقہ فریقوں کو ساتھ لے کر چلنے کی کوشش کی ہے۔ انہوں نے کہا کہ جائیدادوں کے کاغذات کے ساتھ چھیڑ چھاڑ نہیں کی جائے گی۔
وقف بورڈ میں غیر مسلموں کو شامل کرنے کے سوال پر انہوں نے کہا کہ چونکہ وقف بورڈ ایک قانونی ادارہ ہے اس لئے ایسے اداروں کا سکیولر ہونا ضروری ہے۔ اس لیے اس میں مسلم کمیونٹی کے علاوہ چند دیگر لوگوں کو شامل کیا جا رہا ہے لیکن وہ اکثریت میں نہیں ہوں گے اور وقف بورڈ کا انتظام مسلمانوں کے پاس رہے گا۔
مرکزی وزیر نے کہا کہ ملک بھر سے کئی وفود نے وقف بورڈ میں اجارہ داری ختم کرنے کا مطالبہ کیا تھا اور اس کو ذہن میں رکھتے ہوئے تمام طبقات کو نمائندگی دے کر بل کو جامع بنایا گیا ہے۔ انہوں نے کہا کہ اس بل سے مسلمانوں کو فائدہ ہونے والا ہے اور اپوزیشن کو غیر ضروری طور پر لوگوں کو گمراہ نہیں کرنا چاہئے۔
ان کے جواب کے بعد ایوان نے بل کو صوتی ووٹ سے منظور کر لیا۔
ترمیمی تجاویز کانگریس کے ناصر حسین، کمیونسٹ پارٹی آف انڈیا (مارکسسٹ) کے پی سندھوش کمار اور جان برٹاس، سی پی آئی (ایم) کے اے اے رحیم، کمیونسٹ پارٹی آف انڈیا کے وی سیواداسن، راشٹریہ جنتا دل کے منوج جھا، نیشنلسٹ کانگریس پارٹی (شرد پوار) کی فوزیہ خان، ڈی ایم کے کے تروچی سیوا، کنی موجھی، آئی یو ایم ایل کے عبدالوہاب اور سی پی آئی کے پی پی سنیر نے دی تھیں۔
یو این آئی۔ م ش۔