NationalPosted at: Jun 11 2025 9:05PM ہندوستان میں ووٹر لسٹ کی تیاری سب سے دشوار مگر شفاف عمل ہے: گیانیش کمار
نئی دہلی/اسٹاک ہوم، 11 جون (یو این آئی) چیف الیکشن کمشنر گیانیش کمار نے ہندوستان میں ووٹر لسٹ کی تیاری کے کام کو دنیا کے سب سے دشوار مگر شفاف عمل میں سے ایک قرار دیتے ہوغے کہا ہے کہ اس کے لیے کمیشن کے ذریعے مضبوط طریقہ کار ملک میں انتخابات کے وقارکو برقرار رکھنے میں اہم کردار ادا کرتا ہے۔
مسٹر گیانیش کمار منگل کی شام سویڈن میں ایمانداری کے ساتھ انتخابات کے موضوع پر اسٹاک ہوم انٹرنیشنل کانفرنس میں افتتاحی خطاب کررہے تھے۔ انہوں نے یہ بات ایسے وقت میں کہی جب کانگریس پارٹی نے مہاراشٹر کے اسمبلی انتخابات میں استعمال ہونے والی ووٹر لسٹ کے حوالے سے ایک بار پھر کچھ سوالات اٹھائے ہیں اور کمیشن نے انہیں مسترد کردیا ہے۔
مسٹر گیانیش کمار نے اپنے خطاب میں 1960 سے آج تک اور انتخابات سے پہلے ہر سال نظرثانی کے دوران تمام تسلیم شدہ سیاسی جماعتوں کے ساتھ قانونی طریقے سے ووٹر لسٹ کا اشتراک کرنے کے نظام کو اجاگر کیا۔
بدھ کے روز کمیشن کی جانب سے جاری کردہ ایک ریلیز کے مطابق، اپنے خطاب میں، چیف الیکشن کمشنر نے کہا، " اس عمل میں دعوی، اعتراضات اور اپیل کے لیے التزامات ہيں، جو دنیا کے سب سے دشوار اور شفاف طریقہ کار میں سے ایک ہے، جس سے انتخابی عمل کی درستگی اور سالمیت کی تصدیق ہوتی ہے" ۔
انہوں نے کہا کہ یہ مضبوط طریقہ کار سال بہ سال ملک بھر میں انتخابات کے وقار کو برقرار رکھنے میں اہم کردار ادا کر رہا ہے۔
یو این آئی۔ م ش۔
