نئی دہلی، 21 مئی (یو این آئی) کانگریس نے پہلگام دہشت گردانہ حملے کو سیکورٹی کی خامی قرار دیتے ہوئے اسے انٹیلی جنس نظام کی بڑی ناکامی قرار دیا اور کہا کہ اس کے لئے وزیر داخلہ امت شاہ پوری طرح سے ذمہ دار ہیں کانگریس کے سابق فوجی محکمہ کے چیئرمین کرنل روہت چودھری اور ونگ کمانڈر (ریٹائرڈ) انوما آچاریہ نے بدھ کو یہاں پارٹی ہیڈکوارٹر میں ایک پریس کانفرنس میں کہا کہ یہ دہشت گردانہ حملہ مکمل طور پر انٹیلی جنس کی ناکامی اور سیکورٹی کی خرابی تھی اور مسٹر شاہ کو اس کی ذمہ داری قبول کرنی چاہئے۔
انہوں نے کہا کہ پہلگام حملے کے مقام پر نہ تو کوئی سیکورٹی چوکی اور نہ ہی کوئی سیکورٹی اہلکار موجود تھا جبکہ مسٹر شاہ نے حملے سے چند دن پہلے سیکورٹی کا جائزہ لیا تھا اور کہا تھا کہ سب کچھ ٹھیک ہے۔ یہ بات بھی اہم ہے کہ وزیر اعظم نریندر مودی کا 17 اپریل کو ہونے والا دورہ سیکورٹی وجوہات کی بنا پر منسوخ کر دیا گیا تھا۔ اس کا مطلب ہے کہ کچھ انٹیلی جنس معلومات ملی تھیں۔ اگر مودی حکومت کو یہ اطلاع ملی تھی تو احتیاطی اقدامات کیوں نہیں کیے گئے؟ انہوں نے کہا کہ امیت شاہ کو انٹیلی جنس اور سیکورٹی کی ناکامی کی ذمہ داری قبول کرنی چاہئے، کیونکہ سیکورٹی اور انٹیلی جنس نظام براہ راست مرکزی وزارت داخلہ کے تحت آتا ہے۔
انہوں نے اس بات کی بھی نشاندہی کی کہ پچھلے چار سالوں میں جموں و کشمیر کے شہروں سے نیشنل رائفلز اور فوج کی تعیناتی ہٹا دی گئی ہے۔ انہیں صرف انسداد دہشت گردی کی کارروائیوں اور لائن آف کنٹرول کے ساتھ تعینات کیا گیا ہے۔ اس دوران وزارت داخلہ نے تمام حفاظتی انتظامات کو اپنے کنٹرول میں لے لیا ہے۔
کانگریس لیڈروں نے کہا کہ پارٹی اس معاملے پر وزیر اعظم مودی کی صدارت میں کل جماعتی میٹنگ اور پارلیمنٹ کا خصوصی اجلاس بلانے کا مطالبہ کرتی رہی ہے، لیکن مسٹر مودی پچھلی دو آل پارٹی میٹنگ سے غیر حاضر رہے۔ سوال یہ ہے کہ کیا قومی سلامتی ان کی ترجیح نہیں؟
یواین آئی۔ظ ا