NationalPosted at: Apr 24 2024 6:00PM عالمی یوم اردو یادگار مجلہ مولانا امداد صابری کو منسوب ہوگا
نئی دہلی، 24 اپریل (یو این آئی) عالمی یوم اردو کمیٹی کی ایک میٹنگ آج یہاں سینئر صحافی جلال الدین اسلم کی صدارت میں منعقد ہوئی، جس میں ہرسال کی طرح اس سال بھی علامہ اقبال کے یوم پیدائش (9 نومبر، اُردو ڈے) پر خصوصی پروگرام کے دوران عالمی یوم اردو یادگار مجلہ شائع کرنے کے سلسلہ میں تبادلہ خیال ہوا اس موقع پر سینئر صحافی معصوم مرادآبادی کی اس تجویز کو اتفاق رائے سے منظور کیا گیا کہ اس برس کا مجلہ اردو صحافت کے محقق اور نامور ادیب مولانا امداد صابری کے نام منسوب ہوگا، جس میں ان کی حیات وخدمات پر اہم مضامین شائع کئے جائیں گے۔ اس مجلہ کی ترتیب وتدوین کی ذمہ داری بھی جناب معصوم مرادآبادی کو سونپی گئی ہے۔
واضح رہے کہ مولانا امداد صابری اپنے دور کے سب سے بڑے محقق اور مصنف تھے جن کی تصنیفات کی تعداد 100 کے آس پاس ہے۔ مولانا امداد صابری کا سب سے بڑا کارنامہ پانچ ضخیم جلدوں پر مشتمل ’تاریخ اردو صحافت‘ ہے جو اردو صحافت کی تاریخ کے ذیل میں بنیادی حوالہ کا درجہ رکھتی ہے۔ یہ اطلاع آج یہاں عالمی یوم اردو کمیٹی کے کنوینر ڈاکٹر سید احمد خاں نے دی ہے۔ اس کی مجلس ادارت میں معروف صحافی جاوید اختر اور محمد عارف اقبال بھی شامل ہوں گے۔
یو این آئی-ا یف ا ے-م ا