OthersPosted at: Apr 19 2024 3:10PM منی پور میں فائرنگ اور ای وی ایم کی تباہی کی وجہ سے ووٹنگ میں خلل
امپھال، 19 اپریل (یو این آئی) طویل عرصے سے تشدد سے نبردآزما منی پور میں پہلے مرحلے کی ووٹنگ جمعہ کو فائرنگ، الیکٹرانک ووٹنگ مشین (ای وی ایم) کی تباہی اور مسلح افراد کے ووٹروں کو دھمکیاں دینے کی خبروں کی وجہ سے متاثر ہوئی۔
اندرونی منی پور میں پولنگ بوتھ کے اندر موجود کانگریسی ایجنٹوں کو پولنگ بوتھ چھوڑنے کے لیے کہا گیا، جس کے نتیجے میں کانگریس امیدوار اکوئیجام بیمول کی سینئر پولیس والوں کے ساتھ بحث ہوگئی۔
مسٹر بیمول نے کانگریس کے ایجنٹوں کو مختلف پولنگ اسٹیشنوں سے باہر نکالے جانے پر کارروائی نہ کرنے میں پولیس اور سیکورٹی اہلکاروں کے کردار پر سوال اٹھایا۔
تھونگجو میں 5/31 پولنگ اسٹیشن پر ووٹروں نے کچھ مسلح افراد پر ایک مخصوص امیدوار کے حق میں زبردستی ووٹ ڈلوانے کا الزام لگاتے ہوئے ای وی ایم کو تباہ کر دیا۔ تھمناپوکپی میں پولنگ بوتھ کے نزدیک نامعلوم افراد نے فائرنگ کی جس سے کشیدگی اور افراتفری پھیل گئی۔
10/6 اوری پوک میں کچھ مسلح افراد کے بوتھ پر قبضہ کرنے کا الزام لگاتے ہوئے کچھ لوگوں نے ای وی ایم کو تباہ کردیا۔
ووٹنگ صبح 7 بجے شروع ہوئی اور 11 بجے تک 29.61 فیصد ووٹنگ ہو چکی تھی۔
اندرون منی پور میں 31.62 فیصد اور بیرونی منی پور میں 26.02 فیصد ووٹنگ ہوئی۔
یو این آئی۔ م ع۔ 1505