OthersPosted at: Apr 27 2024 2:19PM انڈیا اتحاد کے نئے امیدوار تیسرے مرحلے میں چار سیٹوں پر این ڈی اے کے موجودہ اراکین پارلیمنٹ کو چیلنج کریں گے
پٹنہ، 27 اپریل (یو این آئی) بہار کے لوک سبھا انتخابات 2024 کے تیسرے مرحلے میں، انڈین نیشنل ڈیموکریٹک انکلوسیو الائنس (انڈیا الائنس) کے ٹکٹ پر نئے امیدوار پانچ سیٹوں جھنجھار پور، سپول، ارریہ، مدھے پورہ اور کھگڑیا میں (این ڈی اے) کے موجودہ ممبران پارلیمنٹ کو چیلنج کریں گے۔
بہار لوک سبھا انتخابات کے تیسرے مرحلے کی ووٹنگ 7 مئی کو جھنجھار پور، سپول، ارریہ، مدھے پورہ اور کھگڑیا میں ہونے جا رہی ہے۔ ان پانچ سیٹوں میں سے جھجھار پور، سپول، ارریہ اور مدھے پورہ میں انڈیا الائنس کے بینر تلے پہلی بار لوک سبھا کے لیے لڑنے والے امیدوار این ڈی اے کے موجودہ ممبران پارلیمنٹ کو چیلنج کریں گے۔
وکاس شیل انسان پارٹی (VIP) کے امیدوار سمن مہاسٹھ، جھانجھار پور پارلیمانی سیٹ سے انڈیا اتحاد کے بینر تلے پہلی بار لوک سبھا کی انتخابی لڑائی میں اترے ہیں۔ مسٹر مہاسٹھ اس سیٹ پر موجودہ ایم پی رام پریت منڈل سے مقابلہ کرنے کے لیے تیار ہیں۔ سمن کمار مہاسٹھ اس سے پہلے 2020 کے بہار اسمبلی انتخابات کے دوران مدھوبنی اسمبلی سیٹ سے وی آئی پی کے امیدوار تھے۔
سپول پارلیمانی سیٹ سے راشٹریہ جنتا دل (آر جے ڈی) کے امیدوار چندر ہاس چوپال انڈیا اتحاد کے بینے تلے پہلی بار لوک سبھا میں اپنی قسمت آزمانے کے لیے تیار ہیں۔ اس سیٹ پر مسٹر چوپال کا انتخابی مقابلہ جے ڈی یو کے موجودہ ایم پی دلکیشور کامت سے ہے۔
ارریہ سے سابق مرکزی وزیر مملکت برائے داخلہ تسلیم الدین کے بیٹے اور جوکیہاٹ سے ایم ایل اے شاہنواز عالم نے انڈیا اتحاد کے بینر تلے پہلی بار آر جے ڈی کے ٹکٹ پر لوک سبھا کا الیکشن لڑنے کا فیصلہ کیا ہے۔ مسٹر شاہنواز عالم کا مقابلہ اس سیٹ پر بھارتیہ جنتا پارٹی (بی جے پی) کے ایم پی پردیپ کمار سنگھ سے ہوگا۔
2014 کے لوک سبھا انتخابات میں پردیپ کمار سنگھ نے ارریہ پارلیمانی سیٹ سے بی جے پی کے ٹکٹ پر الیکشن لڑا تھا۔ اس سیٹ پر مسٹر سنگھ کا مقابلہ آر جے ڈی امیدوار سابق مرکزی وزیر تسلیم الدین سے تھا۔ مسٹر تسلیم الدین نے مسٹر سنگھ کو انتخابی میدان میں شکست دی تھی، مسٹر تسلیم الدین کی موت کے بعد سال 2018 میں ارریہ لوک سبھا سیٹ پر ضمنی انتخاب ہوا۔ ضمنی انتخاب میں بی جے پی امیدوار پردیپ سنگھ کا مقابلہ آر جے ڈی امیدوار سرفراز عالم سے ہوا، جو تسلیم الدین کے بڑے بیٹے تھے۔ بی جے پی کے مسٹر سنگھ کو اس الیکشن میں بھی شکست کا منہ دیکھنا پڑا۔ 2019 کے لوک سبھا انتخابات میں بی جے پی امیدوار پردیپ سنگھ نے آر جے ڈی امیدوار سرفراز عالم کو شکست دے کر کامیابی حاصل کی تھی۔ اس الیکشن میں بی جے پی امیدوار پردیپ کمار سنگھ کا مقابلہ آر جے ڈی امیدوار شاہنواز عالم سے ہوگا جو آنجہانی تسلیم الدین کے دوسرے بیٹے ہیں۔
مادھے پورہ پارلیمانی سیٹ سے سابق ایم پی ڈاکٹر رامیندر کمار یادو روی کے بیٹے، بھوپیندر نارائن منڈل یونیورسٹی کے بانی وائس چانسلر اور آئین ساز اسمبلی کے رکن کملیشوری پرساد یادو کے پوتے کمار چندردیپ نے آر جے ڈی کے ٹکٹ پر پہلی بار مدھے پورہ سیٹ سے الیکشن لڑنے کا فیصلہ کیا ہے۔ مسٹر چندردیپ کا انتخابی مقابلہ جے ڈی یو کے موجودہ ایم پی دنیش چندر یادو سے ہے۔
یو این آئی۔ م ش۔