گورکھپور، 6 مئی (یو این آئی) اتر پردیش کے وزیر اعلیٰ یوگی آدتیہ ناتھ نے گورکھپور قیام کے دوران مسلسل دوسرے دن بدھ کی صبح گورکھ ناتھ مندر میں منعقدہ 'جنتا درشن' میں تقریباً 200 لوگوں سے ملاقات کی اور ان کے مسائل سنےوزیر اعلیٰ نے جنتا درشن میں سنگین بیماریوں کے علاج کے لیے مالی امداد کی فریاد لے کر پہنچنے والے لوگوں سے آیوشمان کارڈ کے بارے میں دریافت کیا اور یقین دلایا کہ حکومت علاج میں بھرپور مدد کرے گی۔ انہوں نے موجود افسران کو ہدایت دی کہ ہر ضرورت مند اور اہل شخص کا آیوشمان کارڈ بنوانا یقینی بنایا جائے تاکہ انہیں علاج کے لیے پریشان نہ ہونا پڑے۔
یوگی آدتیہ ناتھ نے جنتا درشن میں آئے ہوئے لوگوں کی درخواستیں خود اپنے ہاتھ میں لیں، ان کا معائنہ کیا اور شکایات کا نوٹس لیا۔ اس موقع پر وزیر اعلیٰ نے لوگوں سے کہا کہ وہ پریشان نہ ہوں، حکومت ہر ضرورت مند کے ساتھ کھڑی ہے۔ انہوں نے مختلف معاملات کے حل کے لیے متعلقہ انتظامی اور پولیس افسران کو درخواستیں روانہ کیں اور ہدایت دی کہ تمام مسائل کا حل وقت مقررہ پر، غیر جانبدارانہ اور اطمینان بخش ہونا چاہیے۔
جنتا درشن میں ہر بار کی طرح اس بدھ کے روز بھی کچھ لوگ علاج کے لیے مالی مدد کی فریاد لے کر آئے تھے۔ وزیر اعلیٰ نے انہیں یقین دلایا کہ رقم کی کمی کی وجہ سے کسی کا علاج نہیں رکے گا۔ انہوں نے کہا کہ جیسے ہی اسپتال کا تخمینہ موصول ہوگا، صوابدیدی فنڈ سے فوری مالی امداد فراہم کر دی جائے گی۔ انہوں نے افسران سے کہا کہ عوام کی ہر تکلیف کا ازالہ یقینی بنایا جائے اور اس میں کسی بھی طرح کی سستی یا لاپرواہی نہیں ہونی چاہیے۔
جنتا درشن میں کچھ خواتین کے ساتھ ان کے بچے بھی آئے تھے۔ وزیر اعلیٰ نے بچوں کو پیار اور دعاؤں کے ساتھ چاکلیٹ دیں۔ اس دوران انہوں نے ایک خاتون کے ساتھ آئے ہوئے دو بچوں سے ہنسی مذاق بھی کیا اور انہیں اسکول جانے کی ترغیب دی۔
یو این آئی۔ م ع۔ایف اے