نئی دہلی، 4 فروری (یواین آئی) مغربی بنگال میں ریاستی حکومت کی جانب سے عوام کو مرکزی حکومت کی اسکیموں کے فوائد سے محروم رکھنے کا معاملہ بدھ کو راجیہ سبھا میں زور و شور سے اٹھایا گیا بھارتیہ جنتا پارٹی کے سمک بھٹاچاریہ نے وقفہ صفر کے دوران یہ معاملہ اٹھاتے ہوئے کہا کہ مغربی بنگال کی حکومت نے مرکز کی متعدد اسکیموں کو نافذ نہیں کیا، جس کے باعث وہاں کے غریب اور پسماندہ طبقات ان اسکیموں کے فوائد سے محروم ہیں۔
ترنمول کانگریس کے ارکان کے زبردست ہنگامے کے درمیان انہوں نے کہا کہ مغربی بنگال ملک کی واحد ریاست ہے جہاں آیوشمان یوجنا نافذ نہیں ہے۔ اسی طرح پردھان منتری سوریہ گھر یوجنا کے ہزاروں درخواستوں کے باوجود اس اسکیم کو ریاست میں نافذ نہیں کیا جا رہا ہے۔ انہوں نے الزام لگایا کہ ریاست کی ترنمول حکومت سیاست کے تحت ایسا کر رہی ہے، جس کا نقصان عام عوام کو اٹھانا پڑ رہا ہے۔
دراوڑ منیترا کزگم (ڈی ایم کے) کی راج شری نے ریلوے میں بزرگ شہریوں کو دی جانے والی کرایہ میں رعایت بحال کرنے کا مطالبہ کیا۔
عام آدمی پارٹی کے ڈاکٹر اشوک مِتّل نے بیرونِ ملک مقیم ہندستانیوں پر بڑھتے حملوں اور ان کی سلامتی کا مسئلہ اٹھایا۔ انہوں نے کہا کہ امریکہ، برطانیہ، کناڈا جیسے ممالک کے ساتھ ہندستان کے اچھے تعلقات کے باوجود وہاں ہندستانیوں پر مسلسل حملے ہو رہے ہیں اور ہر سال بڑی تعداد میں ہندستانی شہری ہلاک ہو رہے ہیں۔ انہوں نے کہا کہ یہ لوگ ملک میں لاکھوں کروڑ روپے کی غیر ملکی کرنسی بھیجتے ہیں اور حکومت کو ان کی حفاظت کے لیے ان ممالک کی حکومتوں سے بات کرنی چاہیے۔
کانگریس کے اکھلیش سنگھ نے مصنوعی ذہانت کے ذریعے ڈیپ فیک ویڈیوز سے پیدا ہونے والے مسائل کا ذکر کرتے ہوئے کہا کہ یہ حکومتوں اور انتظامی نظام کے لیے ایک بڑا چیلنج بن چکا ہے۔
عام آدمی پارٹی کے راگھو چڈھا نے غذائی اشیاء میں ملاوٹ کا مسئلہ اٹھاتے ہوئے کہا کہ یہ عوامی صحت کے لیے سنگین خطرہ بن گیا ہے۔ انہوں نے کہا کہ ملاوٹ پر قابو پانے کے لیے قوانین کو مزید سخت بنانے اور نگرانی کے نظام کو مضبوط کرنے کی ضرورت ہے۔
ڈی ایم کے کے تروچی شیوَا نے تمل ناڈو کے ماہی گیروں کو سری لنکن بحریہ کے ہاتھوں گرفتار کیے جانے کا مسئلہ ایوان کے سامنے رکھتے ہوئے کہا کہ یہ ایک طویل عرصے سے چلی آ رہی مشکل ہے، جس کا تاحال کوئی مستقل حل نہیں نکل پارہاہے۔
بی جے پی کی دھرمشیلا گپتا نے میتھلی کو کلاسیکی زبان کا درجہ دینے کا مطالبہ کیا۔
کانگریس کی جے بی ماتھر ہیشم نے کیرالہ میں ایمس کے قیام کا معاملہ اٹھاتے ہوئے کہا کہ یہ مطالبہ طویل عرصے سے کیا جا رہا ہے۔
بیجو جنتا دل کے شوبھاشیش کھنٹیا نے پوری میں واقع جگن ناتھ مندر میں سکیورٹی انتظامات کو مزید مضبوط بنانے کا معاملہ اٹھایا۔
یواین آئی۔الف الف