نئی دہلی، 18 نومبر (یو این آئی) قومی دارالحکومت کے بھارت منڈپم میں جاری انڈیا انٹرنیشنل ٹریڈ فیئر میں بہار کا کترنی، سُورن منصوری اور سونم چاول لوگوں کی توجہ کا مرکز بنا ہوا ہے۔
بہار پویلین میں گجانن سدھی ونایک فوڈ اس سال تجارتی میلے میں لوگوں کی خاص توجہ حاصل کررہا ہے۔ کترنی، سُورن منصوری اور سونم چاول کو لوگ خوب پسند کر رہے ہیں اور وہ بڑی تعداد میں آرڈر بھی بک کرا رہے ہیں۔
قابل ذکر بات یہ ہے کہ یہ کمپنی بہار میں مکمل طور پر نامیاتی (آرگینک) کھیتی کے ذریعے چاول پیدا کرتی ہے۔ بغیر کسی کیمیکل کے تیار کیے گئے یہ چاول سو فیصد خالص، قدرتی اور صحت کے لیے محفوظ ہیں۔ کمپنی کے پاس چاول کی کل سات اقسام ہیں، جن کی قیمت 40 روپے فی کلو سے 70 روپے فی کلو تک ہے۔ ان میں سب سے مقبول منصوری چاول (40 روپے فی کلو)، سونم اسٹیم چاول (70 روپے فی کلو) اور کترنی وائٹ سیلا چاول (50 روپے فی کلو) ہے۔
اسٹال پر آنے والے زائرین نہ صرف چاول کے معیار اور خوشبو سے متاثر ہو رہے ہیں بلکہ اس کی کیمیکل فری، صاف اور حفظانِ صحت کے مطابق تیاری کی بھی تعریف کر رہے ہیں۔ صحت کے حوالے سے باشعور لوگوں کے درمیان یہ چاول تیزی سے مقبول ہو رہا ہے۔
اس کے علاوہ بہار پویلین میں ریاستی حکومت کی طرف سے انعام یافتہ ناجدہ خاتون کا سِکّی آرٹ، منظور عالم کی لیدر کی مصنوعات اور راکیش کمار کے ہینڈلوم کڑھائی سوٹ بھی لوگوں کو بہت بھا رہے ہیں۔
چمپارن سے آئے منظور عالم نے بتایا کہ لیدر کے پرس، لیڈیز پرس، بیگ، آفس بیگ، ٹرالی بیگ، بیلٹ اور دیگر مصنوعات کے خاص ڈیزائن لوگوں کو بہت پسند آ رہے ہیں۔ یہاں 500 روپے سے لے کر 10 ہزار روپے تک کی مختلف لیدر مصنوعات دستیاب ہیں۔
وہیں ارریہ کے راکیش کمار کے ہینڈلوم کڑھائی سوٹ کے اسٹال پر بہترین ڈیزائن والے کاٹن کڑھائی سوٹ کے ساتھ بھاگلپوری سلک دوپٹہ بھی لڑکیوں اور خواتین کو خوب پسند آ رہا ہے اور وہ خریداری کر رہی ہیں۔
یو این آئی - م ک۔ایف اے