EntertainmentPosted at: Jan 10 2026 2:34PM

موسیقی کی دنیا کے عظیم گلوکار کے جے یسوداس

(سالگرہ کے موقع پر خصوصی تحریر)
ممبئی، 10 جنوری (یو این آئی) کٹاسّری جوزف یسوداس کا شمار ہندوستان کے نامور اور ہمہ جہت گلوکاروں میں ہوتا ہے۔
انہیں نہایت سادہ، منکسر المزاج اور روحانی شخصیت کے طور پر جانا جاتا ہے۔
ان کی آواز کی مٹھاس ان کے جذبات کی آئینہ دار ہے۔
فلموں کے علاوہ کلاسیکی، بھکتی اور روحانی گائیکی میں بھی یسو داس ایک منفرد مقام رکھتے ہیں۔
ان کی گائیکی اتنی دلکش ہے کہ انہیں ’’گانا گندھروَن‘‘(ڈیوائن سنگر) بھی کہا جاتا ہے۔

یسو داس کی پیدائش 10 جنوری 1940 کو کیرالہ کے شہر کوچی میں آگسٹین جوزف اور الزبتھ جوزف کے گھر ہوئی۔
یسوداس سات بہن بھائیوں میں دوسرے نمبر پر تھے۔
ان کے والد ایک معروف موسیقار اور اسٹیج آرٹسٹ تھے۔
موسیقی کا ابتدائی درس یسو داس نے اپنے والد سے حاصل کیا۔
بچپن ہی سے ان کی آواز غیر معمولی طور پر سریلی تھی۔
محض سات سال کی عمر میں یسوداس نے فورٹ کوچی میں منعقدہ ایک مقامی مقابلے میں حصہ لیا اور سونے کا تمغہ جیتا۔
اس کے بعد انہوں نے کرناٹک کلاسیکی موسیقی کی باقاعدہ تربیت حاصل کی۔

انہیں ہندوستانی کلاسیکی موسیقی، خصوصاً کرناٹک موسیقی میں مہارت حاصل ہے۔
ان کی آواز کی پاکیزگی، سادگی اور جذباتی گہرائی نے انہیں ہر عمر کے سامعین میں بے حد مقبول بنایا۔
وہ مشکل کلاسیکی بندشوں سے لے کر سادہ فلمی گیتوں تک سبھی کو یکساں مہارت سے گاتے ہیں۔
بھکتی گیتوں (بھجن، کیرتن، عیسائی مذہبی گیت) میں ان کی آواز میں ایک خاص طرح کی روحانیت محسوس ہوتی ہے۔

یسوداس کے فلمی کریر کا آغاز 1960 کی دہائی میں ملیالم فلموں سے ہوا لیکن جلد ہی ان کی شہرت پورے ہندوستان میں پھیل گئی۔
انہوں نے ملیالم، ہندی، تامل، تیلگو، کنڑ، بنگالی، مراٹھی، اُڑیہ اور پنجابی سمیت متعدد ہندوستانی زبانوں کے علاوہ عربی، انگریزی ، لاطینی اور روسی زبانوں میں بھی گلوکاری کی جو ان کی بین الاقوامی مقبولیت کو ظاہر کرتی ہے۔

جنوبی ہندوستان کی فلموں سے شروعات کرنے کے بعد انہوں نے 1970 کی دہائی میں بالی ووڈ میں قدم رکھا اور 1971 میں فلم ’جے جوان جے کسان‘ سے ہندی فلموں میں ڈیبیو کیا۔
سال1975 میں ریلیز ہوئی فلم ’چھوٹی سی بات‘ کے گیت ’جانِ من جانِ من‘ نے انہیں سامعین کے درمیان کافی مقبول بنا دیا۔
اس کے بعد 1976 کی فلم ’چت چور‘ کے مشہور گیت ’گوری تیرا گاؤں بڑا پیارا‘ نے ان کے کریئر کو نئی بلندی عطا کی اور انہیں قومی ایوارڈ بھی دلایا۔
اس گیت کی موسیقی رویندر جین نے ترتیب دی تھی۔
ان کےمشہور گیتوں میں ’تو جو میرے سر میں سر ملا لے‘، مدھوبن خوشبو دیتا ہے، دل کے ٹکڑے ٹکڑے کرکے مسکراکے چل دیئے، آج سے پہلے آج سے زیادہ، چاند جیسے مکھڑے پر بندیا ستارہ اور جب دیپ جلے آنا جیسے گیت شامل ہیں۔

انہوں نے امیتابھ بچن، امول پالیکر اور جیتندر سمیت ہندی سنیما کے کئی بڑے اداکاروں کے لیے گیت گائے۔
یسوداس نے رویندر جین، بپّی لہری، خیام، راج کمل اور سلیل چودھری جیسے نامور موسیقاروں کے لیے کئی بہترین نغمے گائے۔

سال 1980 میں یسوداس نے ترواننت پورم میں تھرنگِنی اسٹوڈیو قائم کیا لیکن 1992 میں دفتر اور اسٹوڈیو کو چنئی منتقل کردیا اور 1998 میں کمپنی کو امریکہ میں رجسٹر کرایا ۔
تھرنگِنی اسٹوڈیو اور تھرنگِنی ریکارڈز کیرالہ میں ایک اہم ریکارڈنگ مرکز بنے، جہاں پہلی بار ملیالم فلمی گیتوں کی اسٹیریو آڈیو کیسٹیں جاری کی گئیں۔
چنئی کے اسٹوڈیو 27 میں وائس مکسنگ اسٹوڈیو بھی قائم تھا۔
یہ اسٹوڈیو دنیا بھر میں فلمی اور کلاسیکی موسیقی کے پروگرام تیار اور پیش کرتا رہا ہے۔

سال 1999 میں پیرس میں منعقدہ ’میوزک فار پیس‘ پروگرام میں یونیسکو نے یسوداس کو ’’موسیقی اور امن کے لئے شاندار خدمات‘‘ کے اعزازی ایوارڈ سے نوازا۔
یہ تقریب نئے ہزار سالہ دور کے آغاز کے موقع پر منعقد کی گئی تھی، جس میں لیونل رچی، رے چارلس اور زوبن مہتا جیسے عالمی شہرت یافتہ فنکار شامل تھے۔

یسو داس کو ہندوستانی موسیقی میں غیر معمولی خدمات کے اعتراف میں بے شمار اعزازات سے نوازا گیا جن میں پدم شری (1975)، پدم بھوشن (2002)، پدم وبھوشن (2017)، متعدد بار بہترین میل سنگر کے نیشنل فلم ایوارڈ، مختلف ریاستی فلم ایوارڈز اور بین الاقوامی اعزازات بھی شامل ہیں۔

یسوداس کی اہلیہ کا نام پربھا ہے اور ان کے تین بیٹے ونود، وجے اور وشال ہیں۔
دوسرا بیٹا وجے یسوداس، ایک ابھرتا ہوا موسیقار ہے۔

یسو داس نے چھ دہائیوں پر محیط اپنے طویل اور شاندار کریر میں مختلف زبانوں میں تقریباً 50 ہزار سے زائد گیت گائے ہیں۔
ان کے پاس ایک ہی دن میں مختلف زبانوں میں 16 گیت گانے کا عالمی ریکارڈ ہے۔
انہوں نے موسیقی کو صرف تفریح نہیں بلکہ بھکتی کا درجہ دلایا۔
ان کی آواز نسل در نسل سامعین کے دلوں تک پہنچتی رہی ہے۔
ان کی گائیکی نے زبان، مذہب اور خطے کی سرحدوں کو پار کر کے کروڑوں دلوں میں اپنی جگہ بنائی ہے اور وہ آج بھی موسیقی سے محبت کرنے والوں کے لئے باعث تحریک ہیں۔

یو این آئی۔
این یو۔

Entertainment

میرا ارادہ کسی کو تکلیف پہنچانے کا نہیں تھا': تنازع پر ہنی سنگھ کا ردِعمل

بارڈر 2 میں کام کرنے کے لیے فوراً ہاں کہا: آنیا سنگھ

رانی مُکھرجی: مَردانی 3 پوری پولیس فورس کو وقف ہے

جاوید اختر : ہندی فلموں کے بااثر قلم کار

میرا ارادہ کسی کو تکلیف پہنچانے کا نہیں تھا': تنازع پر ہنی سنگھ کا ردِعمل

16 Jan 2026 | 4:34 PM

نئی دہلی، 16 جنوری (یو این آئی) ریپر یو یو ہنی سنگھ ایک بار پھر تنازع میں گھر گئے ہیں۔ دہلی میں ہوئے ان کے ایک شو کی ویڈیو سوشل میڈیا پر وائرل ہونے کے بعد ان پر مبینہ طور پر قابلِ اعتراض تبصرے کرنے کا الزام لگایا گیا ہے، جس کے باعث انہیں آن لائن شدید تنقید کا سامنا کرنا پڑ رہا ہے۔.