نئی دہلی، 6 مئی (یو این آئی) جڑیں زمین سے الگ ہو سکتی ہیں لیکن تہذیب و تمدن سے نہیں، اسی اٹوٹ عزم کے ساتھ ’سندھی کونسل آف انڈیا‘ کی جانب سے تاریخی ’جاپان-کوریا کنکلیو‘ کا انعقاد کیا جا رہا ہے، سندھی کونسل آف انڈیا کے سینئر ایڈوائزر مسٹر موہن آہوجہ نے اس تقریب پر روشنی ڈالتے ہوئے کہا کہ یہ سفر محض ایک سیر و تفریح نہیں بلکہ سندھی برادری کے ’ہجرت سے وسعت‘تک کی ایک زندہ داستان ہے، 1947 کی تقسیم کے کٹھن امتحان میں اپنا سب سب کچھ کھو دینے کے باوجود سندھی سماج نے صفر سے بلندی تک کا سفر طے کیا ہے۔ کسی حکومتی امداد کا انتظار کیے بغیر اس محنت کش طبقے نے اپنی زبان، ثقافت اور لوک گیتوں کو نہ صرف زندہ رکھا بلکہ آج تجارتی دنیا کے شہنشاہ کے طور پر عالمی منظر نامے پر خود کو قائم کیا ہے۔
یہ تاریخی سفر 7 مئی کو شروع ہوگا جس میں کروز کا سفر، جنوبی کوریا اور ٹوکیو (جاپان) اہم پڑاؤ ہوں گے۔ 19 مئی کو ٹوکیو میں مرکزی کنکلیو منعقد ہوگا اور 20 مئی کو اس سفر کا اختتام ہوگا۔ اس تقریب میں ملک و بیرون ملک سے 250 سے زائد مندوبین شرکت کر رہے ہیں، جن میں سینئر آئی اے ایس افسران، سیاسی قیادت اور بڑے کاروباری گھرانے شامل ہیں۔ آر ٹی ڈبلیو (RTW) ٹیم (ونود اور کویتا) کی قیادت میں لاجسٹکس اور ثقافتی پروگراموں کا انتظام کیا جا رہا ہے۔
سندھی کونسل آف انڈیا کے بانی صدر اور سابق رکن پارلیمنٹ محترم سریش کیسوانی کی رہنمائی اور شمالی ہند کے صدر مسٹر اشوک لالوانی و ان کی ٹیم کی انتھک کوششوں سے اس بین الاقوامی کنکلیو کی روپ ریکھا تیار کی گئی ہے۔
بھگوان شری جھولے لال کے 'وسودھیوا کٹمبکم' (پوری دنیا ایک خاندان ہے) کے پیغام کو جاپان کی مقدس سرزمین تک پہنچانا اس کا اہم مقصد ہے۔ اس کے ساتھ ساتھ تجارتی شراکت داری، جاپانی جدت اور ٹیکنالوجی کے ذریعے ایم ایس ایم ای سیکٹر میں نئی سرمایہ کاری اور اسٹریٹجک پارٹنرشپ کے دروازے کھولنا بھی اس ایجنڈے میں شامل ہے۔
سندھی کونسل آف انڈیا کے 'جاپان چیپٹر' کا باقاعدہ آغاز 17 مئی کو ٹوکیو میں ہوگا، جس کی قیادت مسٹر رام پیسومل کلانی کریں گے۔ اس کا مقصد نئی نسل کو مقامی سے عالمی سطح تک پرواز کرنے کی ترغیب دینا ہے۔
سفر کی کامیاب واپسی کے بعد ایک پروقار تقریبِ تقسیمِ اعزازات منعقد کی جائے گی، جس میں جاپانی ثقافت اور وہاں کے تجربات سماج کے سامنے رکھے جائیں گے۔ ساتھ ہی اس مشن کو کامیاب بنانے والی ٹیم، ٹریول ایجنٹوں، فنکاروں اور معاونین کو تعریفی اسناد سے نوازا جائے گا۔ اس تقریب میں میڈیا نمائندگان، اعلیٰ انتظامی افسران، سیاست دان اور مختلف سماجی اداروں کے سربراہان شرکت کریں گے۔ یہ کنکلیو سندھی سماج کی ناقابل تسخیر قوت ارادی کی علامت ہے، جو دنیا کو یہ پیغام دے گا کہ ہم صرف جینا نہیں بلکہ جیتنا جانتے ہیں۔
یو این آئی۔ م س۔ م الف