نئی دہلی، 2 دسمبر (یو این آئی) حکومت اور اپوزیشن کے درمیان پارلیمنٹ میں ووٹر لسٹ کی خصوصی نظر ثانی (ایس آئی آر) پر بحث سے متعلق پیدا ہوا تعطل آج ختم ہو گیا فریقین اس بات پر متفق ہو گئے ہیں کہ آئندہ منگل اور بدھ کے روز لوک سبھا میں انتخابی اصلاحات پر بحث کرائی جائے گی اس اتفاق کے بعد امید ہے کہ بدھ کے روز ایوان کی کارروائی بخوبی چل سکے گی پیر سے شروع ہوئے سرمائی اجلاس کے پہلے دو دن ایس آئی آر کے مسئلے پر بحث کرانے کے مطالبے پر دونوں ایوانوں میں زبردست ہنگامہ ہوا، جس کے نتیجے میں کارروائی متاثر ہوئی۔ تعطل کو دیکھتے ہوئے لوک سبھا کے اسپیکر اوم برلا نے آج دن میں اپوزیشن جماعتوں کے پارلیمانی لیڈروں کی میٹنگ بلائی، جس میں یہ اتفاق رائے ہوا۔
میٹنگ کے بعد پارلیمانی امور کے وزیر کرن رجیجو نے بتایا کہ پیر کے روز دوپہر 12 بجے لوک سبھا میں قومی ترانہ ’وندے ماترم‘ کی 150ویں سالگرہ اور منگل کے روز دوپہر 12 بجے انتخابی اصلاحات پر بحث کی جائے گی۔
اس سے پہلے آج دوسرے دن دونوں ایوانوں میں اپوزیشن کے ہنگامے کے دوران بھی مسٹر رجیجو نے کہا تھا کہ حکومت کسی بھی مسئلے پر بحث کرانے کے لیے تیار ہے۔
انہوں نے کہا کہ اپوزیشن کو اس بات پر سخت رویہ اختیار نہیں کرنا چاہیے کہ بحث کب کرائی جائے۔ تمام مسائل اہم ہیں اور حکومت قواعد کے مطابق کسی بھی مسئلے پر بحث کرانے کو تیار ہے، لیکن اپوزیشن فوری بحث کرانے پر اڑی ہوئی تھی۔
یو این آئی۔ ایس اے