نئی دہلی، 23 مارچ (یو این آئی) تعمیراتی مزدوروں کے ایک وفد نے لوک سبھا میں اپوزیشن لیڈر راہل گاندھی سے ملاقات کی اور سماجی تحفظ، قانونی حقوق اور ان کے کام سے متعلق مسائل پر تفصیل سے تبادلہ خیال کیا۔
دہلی غیر منظم کنسٹرکشن ورکرز یونین کے سکریٹری تھانیشور دیال ادیگوڑ نے، جو وفد کا حصہ تھے، اتوار کو یہاں بتایا کہ تعمیراتی شعبے میں کام کرنے والی مزدور تنظیموں کے ایک وفد نے کانگریس لیڈر راہل گاندھی سے ملاقات کی۔
وفد کے ارکان نے راہل گاندھی جی کے ساتھ سماجی تحفظ، تعمیراتی مزدوروں کے قانونی حقوق اور ان کے کام سے متعلق مسائل پر تفصیل سے تبادلہ خیال کیا۔
ان میں رجسٹریشن اور بینیفٹ کلیمنگ کا عمل، ہیٹ ویو (اسٹروک)، آلودگی سے متاثرہ مزدوروں کو ایکس گریشیا ادائیگی، منریگا اور اینٹ بھٹہ مزدوروں کو تعمیراتی کارکن کے طور پر تسلیم کرنا، خواتین کی مزدوری میں کمی، اجرت میں سنگین عدم مساوات اور استحصال اور تعمیراتی مقامات پر کریچوں کی تعمیر جیسے مسائل شامل تھے۔
مسٹر اڈیگاڑ نے بتایا کہ میٹنگ میں مسائل کے سلسلے میں ایک کانفرنس کے انعقاد پر بھی اتفاق رائے پایا گیا۔
مسٹر گاندھی کے علاوہ پارلیمانی لیبر اینڈ ایمپلائمنٹ کمیٹی میں کانگریس کے ارکان پارلیمنٹ بھی کانفرنس میں شرکت کریں گے۔
وفد میں دہلی غیر منظم تعمیراتی مزدور یونین کے جنرل سکریٹری امجد حسن شامل تھے۔
اس موقع پر تعمیر مزدور پنچایت سنگم کے سکریٹری سبھاش بھٹناگر، دہلی تعمیر شرمک سنگٹھن کے صدر رامیندر، سیلف ایمپلائیڈ ویمن ایسوسی ایشن کی سکریٹری لتا، نیشنل بلڈنگ کنسٹرکشن ایسوسی ایشن کے جنرل سکریٹری خالد رضا خان اور دیگر مزدور رہنما امیتا اپل، نیلم، پروین اور وکاس شرما بھی موجود تھے۔
یواین آئی۔ظ ا