پٹنہ، 4 اکتوبر (یو این آئی) بہار اسمبلی میں قائدِ حزبِ اختلاف اور راشٹریہ جنتا دل (آر جے ڈی) کے لیڈر تیجسوی یادو نے منگل کے روز کہا کہ بہار میں مہاگٹھ بندھن کی حکومت آنے کے بعد کسانوں کو دھان اور گیہوں کی فصل پر کم از کم امدادی قیمت (ایم ایس پی) سے اوپر بونس دیا جائے گا، اور کھیتوں کی آبپاشی پر خرچ ہونے والی بجلی مفت کر دی جائے گی اسی کے ساتھ اسمبلی میں قائدِ حزبِ اختلاف نے یہ بھی کہا کہ ان کی حکومت بننے کے بعد پی اے سی ایس اور تجارتی منڈل کے صدور کو عوامی نمائندے کا درجہ دیا جائے گا۔ مسٹر یادو نے آج ایک پریس کانفرنس میں کہا کہ بہار میں کسانوں کو دھان اور گیہوں کی فصل ایم ایس پی سے بھی کم قیمت پر فروخت کرنی پڑتی ہے۔
انہوں نے کہا کہ مہاگٹھ بندھن نے یہ عہد کیا ہے کہ ان کی حکومت بنتے ہی یہ یقینی بنایا جائے گا کہ بہار کے کسانوں سے دھان اور گیہوں ایم ایس پی پر خریدی جائے اور ہر کوئنٹل کے حساب سے بونس بھی دیا جائے۔ انہوں نے کہا کہ کسانوں کو ایم ایس پی سے اوپر دھان کی سرکاری خرید پر فی کوئنٹل 300 روپے اور گیہوں پر 400 روپے بونس دیا جائے گا۔ انہوں نے مزید کہا کہ کھیتوں کی آبپاشی کے لیے استعمال ہونے والی بجلی بھی مفت کر دی جائے گی۔
انہوں نے یہ بھی کہا کہ عوام کے درمیان کام کرنے والے پی اے سی ایس اور تجارتی منڈل کے صدور کو عوامی نمائندے کا درجہ دیا جائے گا۔ آر جے ڈی کے لیڈر نے اعلانات کی فہرست میں کہا کہ انہوں نے پہلے ہی ’مائی بہن مان یوجنا‘ کے تحت خواتین کو ڈھائی ہزار روپے ماہانہ دینے کا اعلان کیا ہے، اور 14 نومبر مکر سنکرانتی کو ان کی حکومت بننے کے بعد سب کے کھاتوں میں ایک برس کی رقم یعنی 30 ہزار روپے ایک ساتھ بھیج دی جائے گی۔
مسٹر یادو نے کہا کہ ان کی حکومت بننے کے بعد سرکاری ملازمین کے لیے پرانی پنشن اسکیم دوبارہ نافذ کی جائے گی۔ انہوں نے کہا کہ سرکاری پولیس اور صحت کے ملازمین کے بے ترتیب تبادلوں کی وجہ سے انہیں بہت پریشانیوں کا سامنا کرنا پڑتا ہے۔ انہوں نے کہا کہ ان کی حکومت یہ قاعدہ بنائے گی کہ ایسے ملازمین کا تبادلہ صرف 70 کلومیٹر کے دائرے میں ہی کیا جائے۔
یو این آئی۔ ایس اے۔ایس وائی