پنچکولہ، 6 اگست (یو این آئی) ہریانہ میں گڑگاؤں پولیس نے شہر میں مسلسل ہو رہی شدید بارش کے مدنظر کارپوریٹ دفاتر اور نجی اداروں کے لیے ایک ایڈوائزری جاری کی ہے۔ جس میں گزارش کی گئی ہے کہ وہ 6 اگست، 2026 کو اپنے ملازمین کو ورک فرام ہوم (گھر سے کام) کی سہولت فراہم کریں۔
ہریانہ پولیس کے ایک ترجمان نے یہ اطلاع دیتے ہوئے بتایا کہ مسلسل ہو رہی بارش کے باعث گڑگاؤں کی اہم سڑکوں اور چوراہوں پر پانی بھرنے اور ٹریفک جام کی صورتحال بننے کے قوی امکانات ہیں۔ انہوں نے کہا کہ شہریوں کی حفاظت کو یقینی بنانے، غیر ضروری ٹریفک کے دباؤ کو کم کرنے اور سڑک کے نظم و نسق میں مقامی انتظامیہ کی مدد کے مقصد سے گڑگاؤں پولیس نے کارپوریٹ سیکٹر اور نجی اداروں سے ملازمین کو ورک فرام ہوم کی سہولت دینے کی پرزور اپیل کی ہے۔
ترجمان کے مطابق، اگر غیر ضروری گاڑیوں کی آمد و رفت کم ہوتی ہے تو ٹریفک مینجمنٹ ٹیموں کو ٹریفک کی روانی برقرار رکھنے اور ایمبولینس سمیت دیگر ہنگامی خدمات کی بلا تعطل فراہمی کو یقینی بنانے میں کافی مدد ملے گی۔ انہوں نے کہا کہ گڑگاؤں پولیس شہریوں کی حفاظت کو اولین ترجیح دینے میں کارپوریٹ اداروں اور عام لوگوں کے تعاون کو سراہتی ہے۔
یو این آئی۔ ایم جے