ترواننت پورم، 16 مئی (یو این آئی) کانگریس کی قیادت والے متحدہ جمہوری محاذ (یو ڈی ایف) نے پیر کو ہونے والی حلف برداری تقریب سے پہلے نئی کیرالہ کابینہ کی تشکیل کو حتمی شکل دینے کے لیے ہفتہ کو فیصلہ کن بات چیت شروع کر دی ہے۔
وزیر اعلیٰ کے عہدے کے لیے نامزد وی ڈی ساتیسن اور یو ڈی ایف کے کنوینرادوک پرکاش صبح 10 بجے سے اتحادی جماعتوں کے رہنماؤں کے ساتھ وزارتی عہدوں اور محکموں کی تقسیم پر غور کر رہے ہیں۔
جمعہ کو ہونے والی یو ڈی ایف قیادت کی میٹنگ میں طے پایا کہ پیر کو 21 رکنی وزارتی کونسل کے تمام ارکان ایک ساتھ حلف لیں گے۔ اتحاد نے اس بات پر بھی اتفاق کیا کہ اتوار دوپہر تک وزراء کی حتمی فہرست گورنر کو پیش کر دی جائے گی۔ ستیسن، جو جمعہ دیر رات کوچی گئے تھے، آج صبح دوبارہ ترواننت پورم پہنچ کر مذاکرات میں شریک ہونے والے ہیں۔
اتحادی معاہدے کے مطابق، کانگریس کو اسپیکر اور ڈپٹی اسپیکر کے عہدوں کے علاوہ 11 کابینہ وزارتیں ملنے کا امکان ہے۔ انڈین یونین مسلم لیگ (آئی یو ایم ایل) نے مبینہ طور پر پانچ وزارتوں کا مطالبہ کیا ہے، اور امکان ہے کہ یہ مطالبہ تسلیم کر لیا جائے گا۔
اسی دوران کیرالیہ نے دو کابینہ عہدوں کا مطالبہ کیا ہے، تاہم کانگریس قیادت ایک وزارت کے ساتھ چیف وہِپ یا ڈپٹی اسپیکر کا عہدہ دینے کی پیشکش کر رہی ہے۔ پارٹی کے سینئر رہنما پی جے جوزف کا مؤقف ہے کہ ان کی جماعت اپنی عددی طاقت کے لحاظ سے دو وزارتوں کی حقدار ہے۔
یاد رہے کہ یو ڈی ایف نے 2026 کے اسمبلی انتخابات میں زبردست کامیابی حاصل کرتے ہوئے 102 نشستیں جیتیں اور لیفٹ ڈیموکریٹک فرنٹ (ایل ڈی ایف) کی دس سالہ حکومت کا خاتمہ کر کے دوبارہ اقتدار حاصل کیا۔
یو این آئی ایم جے