ممبئی، 6 مئی (یو این آئی) امریکہ کے صدر ڈونالڈ ٹرمپ کے ایران کے ساتھ امن مذاکرات پر دیے گئے بیان اور ایم ایس ایم ای نیز ہوائی جہاز خدمات فراہم کرنے والی کمپنیوں کو قرض کی ضمانت کے مرکزی حکومت کے اعلان سے بدھ کو گھریلو شیئر بازاروں میں شروعاتی کاروبار میں تیزی رہی۔
بی ایس ای کا سینسیکس 406.57 پوائنٹس کی بڑھت کے ساتھ 77,424.36 پوائنٹس پر کھلا۔ کچھ ہی دیر میں یہ 657 پوائنٹس چڑھ کر 77,675 پوائنٹس پر پہنچ گیا۔ تادم تحریر یہ 283.09 پوائنٹس (0.37 فیصد) اوپر 77,300.88 پوائنٹس پر تھا۔
مسٹر ٹرمپ نے کہا ہے کہ ایران کے ساتھ امن مذاکرات میں اچھی پیش رفت ہوئی ہے اور حتمی معاہدہ جلد ممکن ہوگا۔ گھریلو سطح پر حکومت نے مغربی ایشیا کے بحران سے متاثرہ ایم ایس ایم ای کمپنیوں اور ہوائی جہاز خدمات فراہم کرنے والی کمپنیوں کے لیے کریڈٹ لائن گارنٹی کی خصوصی اسکیم کو منگل کو منظوری فراہم کی۔ ان دونوں وجوہات سے بازار میں تیزی رہی۔
نیشنل اسٹاک ایکسچینج کا نفٹی-50 انڈیکس بھی 138.20 پوائنٹس کی مضبوطی کے ساتھ 24,171 پوائنٹس پر کھلا۔ تادم تحریر یہ 106.60 پوائنٹس یعنی 0.44 فیصد چڑھ کر 24,139.40 پوائنٹس پر رہا۔
بازار میں ہمہ جہت خریداری ہے۔ ایف ایم سی جی کو چھوڑ کر دیگر تمام سیکٹروں کے انڈیکس سبز نشان میں ہیں۔ بینکنگ، آٹو، آئی ٹی، فنانس اور میٹل سیکٹر اس بڑھت کی قیادت کر رہے ہیں۔
قرض پر حکومت کی گارنٹی اسکیم سے انڈیگو کا شیئر صبح کے کاروبار میں تین فیصد چڑھا ہے۔ مہندرا اینڈ مہندرا اور بجاج فائنانس کے شیئرز دو فیصد سے زیادہ کی تیزی میں ہیں۔
ٹرینٹ، بجاج فن سرو، ٹیک مہندرا، بی ای ایل، ایکسس بینک، ٹاٹا اسٹیل، ماروتی سوزوکی اور ٹی سی ایس کے شیئرز بھی ایک فیصد سے زیادہ مضبوط ہیں۔ ایل اینڈ ٹی کا شیئر فی الحال سوا تین فیصد سے زیادہ ٹوٹ چکا ہے۔ ہندوستان یونی لیور، پاور گرڈ اور ٹائٹن میں بھی گراوٹ دیکھی جا رہی ہے۔
یو این آئی۔ این یو۔