نئی دہلی، 8 دسمبر (یو این آئی) وزیر اعظم نریندر مودی نے کہا ہے کہ تحریک آزادی کے دوران آزادی پسندوں کا منتر بننے والے گیت 'وندے ماترم' کی گونج نے نہ صرف انگریزوں کی نیند اڑادی تھی بلکہ پورے ہندستان میں جوش وخروش کا ایسا ماحول پیدا کردیاتھا جو نہ صرف آزادی کا منتر بنا بلکہ آزاد ہندستان کے لیے بھی ایک ویژن کے طور پر سامنے آیا۔
پیر کو لوک سبھا میں گیت وندے ماترم کی 150 ویں سالگرہ پر بحث کی شروعات کرتے ہوئے مسٹر مودی نے کہا کہ یہ گیت آزادی کی پکار بن گیا تھا اور ہر شہری اس گیت سے متاثر ہو کر انگریزوں کے خلاف لڑ رہا تھا۔ اس گیت سے ملک میں جو نیا ماحول پیدا ہوا اسے دیکھ کر انگریز بوکھلا گئے تھے اس لیے انہوں نے اس گیت پر پابندی لگا دی اور اسے گانا جرم سمجھ کر لوگوں پر ظلم کرنا شروع کر دیا۔
انہوں نے کہا کہ وندے ماترم ایک ایسا دور رہا ہے جس میں تاریخ کی کئی متاثر کن مثالیں ملک کے سامنے موجود ہیں۔ جب وندے ماترم کے 100 سال مکمل ہوگیے تھے تو اس وقت اس کی صد سالہ تقریب بڑے دھوم دھام سے منائی جانی چاہیے تھی، لیکن اس وقت ملک کو ایمرجنسی میں دھکیل دیا گیا تھا اور ملک کے شہریوں کا گلا گھونٹا جا رہا تھا۔ ملک کی آزادی کی تحریک کو تقویت بخشنے والے وندے ماترم کے سو سال مکمل ہونے کے وقت ملک کو ایمرجنسی کے تاریک دور میں دھکیل دیا گیا تھا۔
وزیر اعظم نے کہا، "وندے ماترم پر بحث میں کوئی حکمراں جماعت یا اپوزیشن نہیں ہے کیونکہ اسی گیت کی تحریک کی وجہ سے ہم سب یہاں بیٹھے ہیں اور یہ ہم سب کے لیے ایک مقدس تہوار ہے۔ آزادی کی جدوجہد وندے ماترم کے جذبے سے لڑی گئی تھی اور اس گیت کے جذبے میں آزادی کے دیوانے ملک کے لیے اپنی جانیں قربان کر رہے تھے۔"
انہوں نے کہا کہ وندے ماترم ایک ایسے وقت میں لکھا گیا جب 1857 کے انقلاب سے برطانوی سلطنت ہل گئی تھی اور ملک کی عظیم شخصیات کو مجبور کیا جا رہا تھا۔ جب وندے ماترم کی آواز ہر طرف گونج رہی تھی اور ملک کو غلام بنائے رکھنے کی ایک بڑی سازش چل رہی تھی، تو اس صورت حال کو بنکم چندر چٹوپادھیائے چیلنج کر رہے تھے۔ انہوں نے 1882 میں ناول "آنند مٹھ" لکھا تو اس میں وندے ماترم گیت شامل کیا جس نے ملک میں آزادی کا جذبہ بیدار کیا۔ ملک کے لوگوں میں جو جذبہ تھا، جو ثقافت تھی اسے وندے ماترم گیت کے ذریعہ ملک کو ایک عظیم تحفہ دیا گیا۔ وندے ماترم صرف آزادی کی جدوجہد کا منتر نہیں تھا، محض انگریزوں کو بھگانے کا منتر نہیں تھا، بلکہ یہ اس سرزمین کو زنجیروں سے آزاد کرانے کی ایک مقدس جنگ بھی تھی۔
جاری یواین آئی۔الف الف