نئی دہلی، 6 دسمبر (یو این آئی) حکومت نے ایئر لائن کمپنیوں کو ہدایت دی ہے کہ وہ "انڈیگو بحران" کے درمیان ہوائی کرایے میں غیر معمولی اضافہ نہ کریں اور انڈیگو کو ہدایت دی ہے کہ وہ اتوار کی شام تک اپنی منسوخ شدہ پروازوں کے ٹکٹوں کی رقم مسافروں کو واپس کرے۔
شہری ہوابازی کی وزارت نے ہفتہ کے روز ایک پریس ریلیز میں کہا کہ اسے معلوم ہے کہ کچھ ایئر لائن کمپنیاں انڈیگو کی پروازوں کی منسوخی کا فائدہ اٹھا رہی ہیں اور حد سے زیادہ کرایہ وصول کر رہی ہیں۔ وزارت نے اس غیر معمولی صورتحال سے متاثر ہونے والے تمام روٹوں میں زیادہ سے زیادہ کرایہ کی حد مقرر کی ہے۔
ریلیز کے مطابق سرکاری ہدایت کی کاپی تمام ایئر لائن کمپنیوں کو بھیج دی گئی ہے۔ وزارت نے کہا کہ زیادہ سے زیادہ کرایہ کے رہنما اصول اس وقت تک نافذ رہیں گے جب تک کہ فلائٹ آپریشن معمول پر نہیں آجاتے ہيں۔
حکومت تمام ضروری معلومات حاصل کر رہی ہیں اور ایئر لائن کمپنیوں کے ساتھ مل کر صورتحال پر نظر رکھے گی۔ وزارت نے کہا ہے کہ اگر کوئی بے ضابطگی پائی جاتی ہے تو "اصلاحی کارروائی" کی جائے گی۔
وزارت نے انڈیگو کو ہدایت دی ہے کہ وہ تمام متاثرہ مسافروں کو بغیر کسی تاخیر کے مکمل رقم کی واپسی کرے۔ منسوخ شدہ یا متاثرہ پروازوں کے لیے ریفنڈ کی رقم اتوار، 7 دسمبر 2025 کی شام 8:00 بجے تک لوٹانے کی ہدایت دی گئی ہے۔ کسی بھی تاخیر کے نتیجے میں ریگولیٹری کارروائی ہوگی۔ مزید برآں، انڈیگو کے بحران سے متاثر ہونے والے مسافروں کو بتایا گیا ہے کہ اگر وہ اپنی سفری تاریخوں یا اوقات میں تبدیلی کرتے ہیں تو کوئی ری شیڈولنگ چارج نہیں لیا جائے گا۔
انڈیگو کو ریفنڈ پروسیسنگ کی نگرانی کے لیے علیحدہ سیل قائم کرنے کی ہدایت دی گئی ہے۔
ایئر لائن کمپنیوں کو اس بات کو یقینی بنانے کی ہدایت دی گئی ہے کہ جن مسافروں کا چیک ان بیگیج منسوخ یا تاخیر کا شکار ہے، ان کی پرواز کے بعد ان کے گھر یا ان کے فراہم کردہ پتے پر بھیج دیا جائے۔
وزارت نے اس بات کو یقینی بنانے کی ہدایت دی ہے کہ مسافروں کو کسی قسم کی تکلیف کا سامنا نہ کرنا پڑے۔
یو این آئی۔ م ش۔