نئی دہلی، 06 دسمبر (یو این آئی) انفورسمنٹ ڈائریکٹوریٹ (ای ڈی) نے ہفتے کو ریلائنس پاور لمیٹڈ کے خلاف ایک معاملے میں ضمنی چارج شیٹ دائر کی۔ جس میں کمپنی پر سولر اینرجی کارپوریشن آف انڈیا (ایس ای سی آئی) کے ٹینڈر کو حاصل کرنے کے لیے مبینہ طور پر فرضی بینک گارنٹی جمع کرانے کا الزام ہے۔
ای ڈی نے اپنی جانچ دہلی پولیس کی اقتصادی جرائم شاخ (ای او ڈبلیو) کی جانب سے درج کی گئی ایف آئی آر کی بنیاد پر شروع کی۔ ایک ایف آئی آر ایس ای سی آئی کی شکایت پر ریلائنس این یو بی ای ایس ایس لمیٹڈ (ریلائنس پاور لمیٹڈ کی مکمل ملکیتی ذیلی کمپنی) کے خلاف درج کی گئی تھی، جبکہ دوسری ایف آئی آر ریلائنس این یو بی ای ایس ایس لمیٹڈ نے بسوال ٹریڈلنک پرائیویٹ لمیٹڈ اور اس کے منیجنگ ڈائریکٹر پارتھ سارتھی بسوال کے خلاف درج کرائی تھی۔
ای ڈی کے ایک افسر نے کہا، ’’ریلائنس پاور لمیٹڈ (اپنی ذیلی کمپنی ریلائنس این یو بی ای ایس ایس لمیٹڈ کے ذریعے) نے ایس ای سی آئی کے ایک ٹینڈر کے لیے بولی لگائی تھی، جس میں 1000 میگاواٹ / 2000 میگاواٹ-گھنٹہ اسٹینڈ الون بیٹری انرجی اسٹوریج سسٹم (بی ای ایس ایس) پروجیکٹس نصب کیے جانے تھے۔ بولی لگانے والے کو 68.2 کروڑ روپے کی بینک گارنٹی جمع کرانی تھی۔ ٹینڈر کی شرائط کے مطابق، اگر بینک گارنٹی کسی غیر ملکی بینک کی طرف سے جاری کی جاتی ہے، تو اسے اس بینک کی ہندوستانی شاخ یا اسٹیٹ بینک آف انڈیا (ایس بی آئی) سے منظوری لینا ضروری ہوتا ہے۔"
ای ڈی نے کہا کہ انسداد منی لانڈرنگ ایکٹ (پی ایم ایل اے) کے تحت کی گئی جانچ میں یہ انکشاف ہوا کہ ریلائنس پاور لمیٹڈ نے غلط ارادے سے ایک شیل کمپنی، بسوال ٹریڈلنک پرائیویٹ لمیٹڈ کی خدمات حاصل کر کے فرضی بینک گارنٹی کا انتظام کروایا۔ یہ گارنٹی فلپائن کے منیلا میں فرسٹرینڈ بینک کی ایک غیر موجود شاخ اور ملیشیا کے اے سی ای انویسٹمنٹ بینک لمیٹڈ کے نام پر بنائی گئی تھی۔ اس کے علاوہ، فرضی گارنٹی کی منظوریاں ایک نقلی ایس بی آئی ای میل آئی ڈی اور فرضی منظوری کے خطوط کا استعمال کر کے تیار کیے گئے تھے۔
ای ڈی نے بتایا، ’’اس مقصد کے لیے ایس بی آئی ڈاٹ سی او ڈاٹ اِن سے ملتے جلتے ایک فرضی ڈومین ایس-بی آئی ڈاٹ سی او ڈاٹ اِن کا استعمال کیا گیا۔ اس کے علاوہ، ریلائنس پاور لمیٹڈ نے اپنی ایک دیگر ذیلی کمپنی، روسا پاور سپلائی کمپنی لمیٹڈ سے 6.33 کروڑ روپے کو شیل کمپنی بسوال ٹریڈلنک پرائیویٹ لمیٹڈ کو فرضی نقل و حمل کی خدمات کے نام پر بھیجا، تاکہ فرضی بینک گارنٹی کے انتظام کو فنڈ کیا جا سکے۔‘‘
جانچ میں مزید پتہ چلا کہ ریلائنس گروپ کے افسران نے پارتھ سارتھی بسوال کے ساتھ مل کر فرضی ورک آرڈر اور فرضی انوائس تیار کیے۔ فرضی بینک گارنٹی تیار ہو جانے کے بعد، ریلائنس پاور لمیٹڈ نے اس انتظام کو ایک حقیقی کاروباری لین دین دکھانے کے لیے شیل کمپنی کو 5.40 کروڑ روپے کی بڑی فیس بھی ادا کی تھی۔ ای ڈی نے الزام لگایا کہ ریلائنس گروپ کے افسران پوری طرح سے جانتے تھے کہ ایس ای سی آئی کو ایک فرضی بینک گارنٹی اور فرضی ایس بی آئی منظوری، نقلی ایس بی آئی ای میل آئی ڈی سے بھیجے جا رہے ہیں۔
پی ایم ایل اے جانچ میں یہ پتہ چلا ہے کہ ریلائنس گروپ نے ایس ای سی آئی ٹینڈر حاصل کرنے کے لیے فرضی بینک گارنٹی اور فرضی ایس بی آئی منظوری جمع کرانے میں ملی بھگت اور بد نیتی سے کام کیا تھا۔ جانچ کے دوران ریلائنس پاور لمیٹڈ کے چیف فنانشل آفیسر اشوک کمار پال اور دیگر ساتھیوں کو گرفتار کر لیا گیا ہے، جو فی الحال عدالتی حراست میں ہیں۔
ضمنی چارج شیٹ دائر کرنے سے پہلے ای ڈی نے اس معاملے میں 5.15 کروڑ روپے کی جرم سے حاصل شدہ جائیداد کو بھی قرق کیا ہے۔
یو این آئی - م ک۔ایف اے