آگرہ/نئی دہلی؛ 23 مارچ، (یو این آئی) لوک سبھا کے اسپیکر اوم برلا نے آج تمام اسٹیک ہولڈرز - کسانوں، صنعت کاروں، سائنس دانوں اور صنعت کے رہنماؤں پر زور دیا کہ وہ ہندوستان کو تیل کے بیجوں کی پیداوار میں خود کفیل بنانے اور اس شعبے میں آگے بڑھنے میں اہم کردار ادا کرنے کے عزم کے ساتھ اکٹھے ہوں۔
اس بات کا ذکر کرتے ہوئے کہ ہندوستان میں خوردنی تیل کی مانگ اس کی گھریلو سپلائی سے کہیں زیادہ ہے، مسٹر برلا نے صنعت کے رہنماؤں اور آئل مل مالکان سے اپیل کی کہ وہ وزیر اعظم نریندر مودی کے خود انحصار ہندوستان کے وژن کے مطابق درآمدی انحصار کو کم کرنے کے لیے اختراعات کریں اور حل تلاش کریں۔
انہوں نے کہا کہ ہندوستان تبدیلی کے ایک مرحلے سے گزر رہا ہے اور یہ ضروری ہے کہ ہمارے کسان اس تبدیلی کے کلیدی محرک بنیں اور اپنی پیداوار کی مناسب قیمت حاصل کریں۔
مسٹر اوم برلا نے آج آگرہ میں یوپی آئل ملرس ایسوسی ایشن کے زیر اہتمام منعقدہ 45ویں ربیع آل انڈیا آئل سیڈس سیمینار سے خطاب کر تے ہوئے ان خیالات کا اظہار کیا۔
لوک سبھا اسپیکر نے کہا کہ ہمارے کسانوں اور آئل پروسیسنگ انڈسٹری کو مل کر کام کرنا چاہیے اور اس بات پر زور دیا کہ تحقیق اور نئی اور بہتر ٹیکنالوجی کے ساتھ اعلیٰ معیار کے تیل کے بیج تیار کیے جانے چاہئیں۔ مسٹر برلا نے زرعی سائنسدانوں اور آئل ملرز ایسوسی ایشن پر زور دیا کہ وہ بہتری اور خود انحصاری کے لیے فعال طور پر تعاون کریں۔ انہوں نے سائنسدانوں پر بھی زور دیا کہ وہ موسم کے موافق، زیادہ پیداوار دینے والے بیجوں کی بہتر اقسام تیار کریں، تاکہ تیل کے بیجوں کی پیداوار میں مسلسل اضافہ ہو سکے۔ انہوں نے معروف یونیورسٹیوں اور اداروں کے ساتھ تحقیقی کام میں تعاون کی اہمیت اور ہندوستانی تیل کے صحت سے متعلق فوائد کے بارے میں عوام میں بیداری پیدا کرنے کی ضرورت پر زور دیا۔
اس بات کا ذکر کرتے ہوئے کہ وسطی ہندوستان کی مٹی اور آب و ہوا تیل کے بیجوں کی کاشت کے لیے انتہائی موزوں ہے جہاں اکثر کم سے کم آبپاشی کی ضرورت ہوتی ہے، انہوں نے یہ بھی کہا کہ حکومت کی طرف سے کئے گئے اقدامات سے آبپاشی کے بنیادی ڈھانچے میں بہتری آئی ہے اور زرعی پیداواری صلاحیت میں اضافہ ہوا ہے۔
غذائیت میں ہندوستانی تیل کے بیجوں کی فصلوں کی اہمیت کو اجاگر کرتے ہوئے مسٹر برلا نے اقتصادی سلامتی کے ساتھ ساتھ غذائی تحفظ کو بڑھانے کے لیے دیسی تیل کو فروغ دینے کی ضرورت پر زور دیا۔ انہوں نے دیسی تیل کو اپنانے کی اہمیت کا اعادہ کیا۔ انہوں نے مزید کہا کہ ہمارے اردگرد کی مٹی اور آب و ہوا میں قدرتی طور پر اگنے والی چیزیں ہماری صحت کے لیے سب سے زیادہ فائدہ مند ہیں۔
تیل کے بیجوں کے شعبے کی ترقی کو 'وکل فار لوکل' ویژن سے جوڑتے ہوئے لوک سبھا اسپیکر نے کسانوں کو جدید ٹیکنالوجی کو اپنانے، مناسب تربیت حاصل کرنے اور بہتر پیداوار اور زیادہ آمدنی کے لیے حکومتی اسکیموں سے فائدہ اٹھانے کی ترغیب دی۔ چھوٹے شعبوں میں اسٹارٹ اپس کی مدد سے دستیاب بے پناہ مواقع کو اجاگر کرتے ہوئے مسٹر برلا نے نامیاتی کاشتکاری اور پروسیسنگ، پیکیجنگ اور تیل کے بیجوں کی مصنوعات کی تقسیم میں کاروباریوں کی شرکت پر زور دیا۔
مسٹر برلا نے یقین ظاہر کیا کہ 45 ویں ربیع آل انڈیا آئل سیڈس سیمینار میں ہونے والی بات چیت سے ہندوستان کی تیل کے بیجوں کی صنعت کو ایک نئی سمت ملے گی اور خود انحصاری کے ہدف کو حاصل کرنے میں بھی مدد ملے گی۔
اس موقع پر ماہی پروری، مویشی پروری اور ڈیری اور پنچایتی راج کی وزارت کے وزیر مملکت ایس پی سنگھ بگھیل اور دیگر اہم شخصیات موجود تھیں ۔
یو این آئی ۔ ع خ