یوم پیدائش 13 فروری
ممبئی، 13 فروری (یو این آئی) ممتاز جہاں بیگم عرف مدھوبالا، ہندوستانی فلمی تاریخ کی سب سے خوبصورت اور باصلاحیت اداکاراؤں میں شمار ہوتی ہیں۔
بلاشبہ مدھوبالا کی خوبصورتی کو ہندستان سنیما کی تاریخ میں ایک مثال اور معجزہ سمجھا جاتا ہے۔
انہیں اکثر “وینس آف انڈین سنیما” کہا جاتا تھا، کیونکہ ان کے چہرے کی دلکشی، مسکراہٹ کی معصومیت اور آنکھوں کی گہرائی دیکھنے والوں کو مسحور کر دیتی تھی۔

مدھوبالا کی خوبصورتی صرف ظاہری حسن تک محدود نہیں تھی بلکہ اس میں ایک قدرتی نرمی، معصومیت اور دل کو چھو لینے والی کشش تھی۔
ان کا چہرہ کیمرے پر اس قدر روشن اور جاذبِ نظر دکھائی دیتا تھا کہ سیاہ و سفید دور میں بھی وہ پردۂ سیمیں پر جگمگاتی محسوس ہوتی تھیں۔

فلم مغلِ اعظم میں انارکلی کے روپ میں ان کی خوبصورتی اپنے عروج پر نظر آتی ہے—نازک انداز، شفاف جلد، بڑی بڑی آنکھیں اور درد بھری مسکراہٹ نے انہیں لازوال بنا دیا۔
اسی طرح محل میں ان کی پراسرار دلکشی نے ناظرین کو حیران کر دیا تھا۔

مدھوبالا کی مسکراہٹ میں سادہ مگر دل میں اتر جانے والا ایک جادو تھا۔
ان کی خوبصورتی میں مشرقی نزاکت، معصومیت اور فطری وقار کا ایسا امتزاج تھا جو آج بھی انہیں دنیا کی خوبصورت ترین اداکاراؤں میں شمار کراتا ہے۔

مدھوبالا 14 فروری 1933 کو ایک متوسط خاندان میں پیدا ہوئیں اور بعد میں اپنے خاندان کے ساتھ ممبئی چلی گئیں، جہاں ان کا فلمی سفر شروع ہوا۔
ان کے والد عطااللہ خان فلم انڈسٹری میں قسمت آزمانے کے لیے خاندان کو ممبئی لے آئے۔
گھر کی مالی مشکلات کے باعث مدھوبالا نے بچپن ہی سے فلموں میں کام شروع کر دیا اور “بیبی ممتاز” کے نام سے جانی گئیں۔

جاری یواین آئی۔
ایم جے