NationalPosted at: Nov 17 2025 8:07PM ہندوستانی عمرہ زائرین کی المناک ٹریفک حادثے میں اموات پر این۔ڈی۔اے پلگرم انڈیا کے صدر کا اظہارِ افسوس
نئی دہلی،17(یو این آئی) سعودی عرب میں پیش آنے والے افسوس ناک سڑک حادثے میں ہندوستانی عمرہ زائرین کی اموات پر گہرے رنج و غم کا اظہار کرتے ہوئے این ڈی اے پیلگرم انڈیا کے صدر الحاج سید قمر عباس نقوی نے جاں بحق افراد کے لیے مغفرت اور لواحقین کے لیے صبر و استقامت کی دعا کی ہے۔
این۔ڈی۔اے پیلگرم انڈیا کی ایک ریلیز کے مطابق مسٹرقمرعباس نقوی نے کہا یہ ایسی کرب ناک خبر ہے جس نے صرف چند خاندانوں کو نہیں بلکہ پورے ملک کو غم زدہ کر دیا ہے۔ آپ نے حکومت سعودی سے مطالبہ کیا کہ حادثے کی پوری دیانتداری اور شفافیت کے ساتھ اعلیٰ سطحی تحقیقات کرائی جائیں اور غفلت و کوتاہی برتنے والوں خلاف سخت کارروائی کی جائے۔
انہوں نے کہا کہ انشورنس، معاوضہ، تدفین اور مرحومین کے ورثہ کو سہولیات فراہم کرنا تو حکومت کی بنیادی ذمہ داری ہوتی ہے ۔ الحاج سید قمر عباس نقوی نے مزید کہا کہ سب جانتے ہیں کہ حج و عمرہ مذہبی امور و عبادات کے ساتھ سعودی عرب کی معیشت کا ایک اہم ستون بھی ہیں۔ ایسے میں زائرین کے آمد و رفت کے اوقات میں ایک ہی شاہراہ پر آئل ٹینکر کو اتارنا زائرین کی جانوں کو خطرے میں ڈالنے کے مترادف ہے، جس کی ذمہ داری حکومتِ سعودی عرب کو انسانی بنیادوں پر قبول کرنی چاہیے۔
اِس موقع پر انہوں نے حکومتِ ہند کی کوششوں کو سراہا کہ سعودی عرب میں ہندوستانی سفارت خانہ اور دہلی میں وزارتِ خارجہ مسلسل متاثرین کی مدد میں مصروف ہیں -
یواین آئی۔ایف اے