نئی دہلی، 13 فروری (یو این آئی) وزیراعظم نریندر مودی نے جمعہ کو بنگلہ دیش نیشنلسٹ پارٹی (بی این پی) کو پارلیمانی انتخابات میں فیصلہ کن کامیابی دلانے پر طارق رحمان کو مبارکباد دی اور ایک جمہوری اور ترقی پسند ہمسایہ ملک کی حمایت جاری رکھنے کے ہندستان کے عزم کا اعادہ کیا سوشل میڈیا پلیٹ فارم ایکس پر اپنے پیغام میں وزیراعظم مودی نے مسٹر رحمان کو مبارکباد پیش کرتے ہوئے کہا، “یہ کامیابی بنگلہ دیش کے عوام کے آپ کی قیادت پر اعتماد کو ظاہر کرتی ہے۔”
وزیر اعظم نے بنگلہ دیش کے جمہوری سفر کے لیے ہندستان کی مسلسل حمایت کو اجاگر کیا۔ انہوں نے کہا، “ہندستان ایک جمہوری، ترقی پسند اور شمولیتی بنگلہ دیش کی حمایت جاری رکھے گا،” جس سے نئی دہلی کی ڈھاکہ کی نئی قیادت کے ساتھ قریبی تعاون کی تیاری ظاہر ہوتی ہے۔
مسٹر مودی نے دو طرفہ تعلقات کے مستقبل پر بھی امید ظاہر کی۔ انہوں نے کہا، “میں آپ کے ساتھ مل کر اپنے کثیر جہتی تعلقات کو مزید مضبوط بنانے اور مشترکہ ترقیاتی اہداف کو آگے بڑھانے کا منتظر ہوں۔”
ہنوستان اور بنگلہ دیش کے درمیان تاریخی، ثقافتی اور اقتصادی تعلقات گہرے ہیں، جن میں تجارت، رابطہ کاری، توانائی، آبی وسائل اور سکیورٹی سمیت کئی شعبوں میں تعاون شامل ہے۔ گزشتہ دہائی میں دونوں ممالک کے تعلقات خاص طور پر سرحد پار بنیادی ڈھانچے اور علاقائی رابطہ کاری کے منصوبوں میں نمایاں وسعت آئی ہے۔
بی این پی، جو بنگلہ دیش کی بڑی سیاسی جماعتوں میں سے ایک ہے، 1990 کی دہائی سے ملک کی سیاست میں اہم کردار ادا کرتی رہی ہے۔ پارٹی کی انتخابی کامیابی کے بعد طارق رحمان اب قیادت کے مرکزی کردار میں ابھرے ہیں، جو بنگلہ دیش کی داخلی سیاست میں ایک نئے مرحلے کی نشاندہی کرتا ہے۔
مبصرین کے مطابق پارلیمانی انتخابات کا نتیجہ ہند-بنگلہ دیش تعلقات کی سمت پر اثر انداز ہو سکتا ہے، خاص طور پر تجارت، سرحدی انتظام اور علاقائی تعاون جیسے شعبوں میں۔ وزیر اعظم مودی کے پیغام سے یہ واضح ہوتا ہے کہ نئی دہلی ڈھاکہ کی نئی قیادت کے ساتھ تعاون کو جاری رکھتے ہوئے تعلقات کو مزید گہرا کرنے کا ارادہ رکھتا ہے۔
یو این آئی۔ ایم جے