امپھال، 13 ستمبر (یو این آئی) وزیر اعظم نریندر مودی نے کہا ہے کہ مرکزی حکومت منی پور میں امن بحال کرنے اور ریاست کے لوگوں کی زندگیوں کو پٹری پر لانے کے لیے ہر ممکن کوشش کر رہی ہے اور ریاست کی ترقی کے لیے ریاستی حکومت کے ساتھ مکمل تعاون کرے گی مسٹر مودی نے ہفتہ کو یہاں ایک بڑے عوامی اجتماع سے خطاب کرتے ہوئے کہا کہ منی پور کی ترقی کے لئے امن ضروری ہے اور ان کی حکومت یہاں کے لوگوں کی زندگیوں کو پٹری پر لانے کے لئے ہر ممکن مدد فراہم کر رہی ہے۔ تشدد کی وجہ سے بے گھر ہونے والوں کے لیے 7000 گھر بنائے جائیں گے۔
وزیر اعظم نے کہا، "میں وعدہ کرتا ہوں کہ حکومت ہند آپ کے ساتھ ہے اور حکومت یہاں کی زندگی کو دوبارہ پٹری پر لانے کی ہر ممکن کوشش کر رہی ہے۔ مرکزی حکومت بے گھر ہونے والے لوگوں کے لیے 7000 مکانات تعمیر کرے گی۔ تشدد کی وجہ سے بے گھر ہونے والے لوگوں کے لیے 500 کروڑ روپے کا التزام کیا گیا ہے۔"
انہوں نے کہا کہ عوام کے مسائل کے حل کے لیے بلدیاتی اداروں کو مضبوط کیا جائے گا اور اس کے لیے فنڈز کا بھی بندوبست کیا جا رہا ہے۔ قبائلی علاقوں کی ترقی کے لیے پہلی بار دھرتی آبا یوجنا نافذ کی جا رہی ہے۔ قبائلی علاقوں میں ایکلویہ اسکولوں کی تعداد میں اضافہ کیا جارہا ہے اور منی پور میں 18 ایکلویہ اسکول کھولے جارہے ہیں۔
وزیراعظم نے کہا کہ حکومت خواتین کے لیے ورکنگ ہاسٹل بنا رہی ہے تاکہ بیٹیوں کو کسی قسم کی پریشانی کا سامنا نہ کرنا پڑے۔ منی پور کی ترقی کے لیے جلد از جلد امن قائم کرنے کے لیے مرکزی حکومت منی پور حکومت کا تعاون جاری رکھے گی۔ انہوں نے کہا کہ منی پور کے دارالحکومت امپھال کو جلد ہی ریلوے نیٹ ورک سے جوڑا جائے گا، جس پر 22 ہزار کروڑ روپے لاگت آئے گی۔
وزیر اعظم نے کہا، "مرکزی حکومت کی مسلسل کوشش رہی ہے کہ منی پور کو تیزی سے ترقی کی راہ پر لے جائے، اسی سلسلے میں، میں آج آپ سب کے درمیان یہاں آیا ہوں۔ تھوڑی دیر پہلے اسی پلیٹ فارم سے تقریباً 7 ہزار کروڑ روپے کے پروجیکٹوں کا سنگ بنیاد رکھا گیا ہے۔ یہ پروجیکٹ منی پور کے لوگوں، یہاں پہاڑوں پر رہنے والے قبائلی کمیونٹی کی زندگی کو مزید بہتر بنائیں گے۔"
یواین آئی۔الف الف