نئی دہلی، 8 نومبر (یواین آئی) وزیر اعظم نریندر مودی ہفتہ کی شام راجدھانی میں بھارتیہ جنتا پارٹی کے بزرگ رہنما اور سابق نائب وزیر اعظم لال کرشن اڈوانی کی رہائش گاہ پر گئے اور انہیں ان کی سالگرہ پر مبارکباد دی مسٹر مودی نے اس ملاقات کی تفصیلات سوشل میڈیا پلیٹ فارم انسٹاگرام پر ایک تصویر کے ساتھ شیئر کیں۔ وزیر اعظم نے انسٹاگرام پر لکھاکہ "انہوں (اڈوانی) نے قوم کے لیے بے پناہ اور ناقابل فراموش خدمات انجام دی ہیں اور ہم سب کے لیے ایک عظیم ترغیب رہے ہیں۔"
آج صبح مسٹر مودی نے انسٹاگرام پر ایک پوسٹ کے ذریعہ مسٹر اڈوانی کو ان کی سالگرہ کی مبارکباد دی تھی۔ اپنے مبارکبادی پیغام میں انہوں نے لکھاکہ "مسٹر لال کرشن اڈوانی کو ان کی سالگرہ پر دل کی گہرائیوں سے مبارکباد۔ عظیم وژن اور دانشمندی سے مالا مال سیاست داں، اڈوانی جی کی زندگی ہندوستان کی ترقی کو مضبوط کرنے کے لیے وقف رہی ہے۔ ہندوستان کے ثقافتی اصولوں میں ان کی نمایاں خدمات ہیں۔ ایشور انہیں اچھی صحت اور لمبی زندگی عطا کرے۔"
آج مسٹر اڈوانی کی 98ویں سالگرہ ہے۔ وہ 8 نومبر 1927 کو غیر منقسم ہندوستان کے شہر کراچی میں پیدا ہوئے۔ وہ شروع سے ہی راشٹریہ سویم سیوک سنگھ (آر ایس ایس) اور جن سنگھ (بھارتی جنتا پارٹی کے پیشرو) سے وابستہ تھے۔ انہوں نے 1970 کی دہائی میں مرکز میں پہلی غیر کانگریسی مرارجی دیسائی حکومت میں اطلاعات و نشریات کے وزیر کے طور پر خدمات انجام دیں۔ انہوں نے 1990 کی دہائی کے آخر اور 2000 کی دہائی کے اوائل میں اٹل بہاری واجپائی حکومت میں نائب وزیر اعظم کے طور پر کام کیا، وزارت داخلہ کا اہم قلمدان سنبھالا۔ مسٹر اڈوانی 2004 سے 2009 تک لوک سبھا میں اپوزیشن کے لیڈر رہے۔
ایودھیا رام جنم بھومی مندر تحریک میں ان کے کردار نے ملک کی سیاست پر گہرا اثر چھوڑا۔
یواین آئی۔ ظ ا