سالگرہ 11 نومبر کے موقع  پر
ممبئی، 11 نومبر (یواین آئی) مشہور ہندی فلم اداکارہ مالا سنہا اپنی خوبصورتی اور صلاحیت دونوں کے لیے جانی جاتی ہیں 1950 سے 1970 کی دہائی تک ہندی فلموں کی صفِ اول کی ہیروئینوں میں ان کا شمار ہوتا ہے انہوں نے ہندی کے ساتھ ساتھ بنگالی اور نیپالی فلموں میں بھی کام کیا ہے اپنی خوبصورت شخصیت، پروقار انداز اور اداکاری کے گہرے تاثر کے باعث آج بھی کلاسیکی ہندوستانی سنیما کی سب سے معتبر اداکاراؤں میں شمار کی جاتی ہیں۔
اداکاری کے علاوہ مالاسنہا موسیقی کی بھی شوقین تھیں، لیکن فلموں کی خاطر انہوں نے اپنے گلوکاری کے شوق کو قربان کر دیا۔

11 نومبر 1936 ایک نیپالی عیسائی خاندان میکن پیدا ہوئی مالا سنہا کے والد کا نام البرٹ سنہا تھا۔
جوانی میں بطور اداکارہ انہوں نے اپنا نام تبدیل کر کے مالا سنہا رکھ لیا۔
بچپن سے ہی مالا سنہا کا رجحان اداکاری سے زیادہ موسیقی کی طرف تھا۔
وہ نہ صرف گاتی تھیں بلکہ آل انڈیا ریڈیو میں بطور گلوکارہ بھی کام کر چکی تھیں۔
لیکن جب انہیں فلموں میں کام کرنے کا موقع ملا تو انہیں اداکاری یا گلوکاری مین سے ایک کا انتخاب کرنا پڑا ، انہوں نے فلموں کے لیے اپنے سنگنگ کیریئر کو خیر باد کہہ دیا اور یہی ان کے فلمی سفر کی بنیاد بنا۔

بچپن سے ہی مالاسنہا کو ڈانس اور موسیقی سے گہری دلچسپی تھی اور انہوں نے دونوں فنون میں باقاعدہ تربیت بھی حاصل کی تھی وہ اسکول کے ڈراموں میں بھی حصہ لیتی تھیں۔
ایک دن اسکول کے ایک فنکشن میں ایک مشہور فلم ڈائریکٹر مدعو تھے۔
اس فنکشن میں مالا سنہا نے ایک ڈرامے میں اداکاری کی اور جیسے ہی ڈائریکٹر نے ان کی پرفارمنس دیکھی، وہ ان کے فن کے قائل ہو گئے۔
فنکشن کے فوراً بعد وہ مالا کے گھر پہنچے اور ان کے والد البرٹ سنہا سے کہا کہ آپ کی بیٹی میں اداکاری کی زبردست صلاحیت ہے، اسے فلموں میں موقع ملنا چاہیے۔
والد صاحب نے بھی ڈائریکٹر کی بات سے اتفاق کیا، اور یوں مالا سنہا نے بطور چائلڈ آرٹسٹ اپنے فلمی سفر کی شروعات کی۔

ایک بنگالی فلم جئے ویشنو دیوی سے بطور چائلڈ آرٹسٹ شروعات کے بعد 1952 میں ان کی پہلی بڑی فلم روشن آرا ریلیز ہوئی۔
اس کے بعد انہوں نے کئی بنگالی فلموں میں کام کیا۔
انہی دنوں ایک فلم کی شوٹنگ کے لیے وہ ممبئی آئیں، جہاں ان کی ملاقات مشہور اداکارہ گیتا بالی سے ہوئی۔
گیتا بالی ان کی شخصیت اور صلاحیت سے بہت متاثر ہوئیں اور انہوں نے فلم ڈائریکٹر کیدار شرما سے درخواست کی کہ وہ مالا سنہا کو بالی ووڈ میں موقع دیں۔
گیتا کی سفارش پر کیدار شرما نے مالا سنہا کو اپنی فلم‘’ رنگین راتیں‘ میں بطور ہیروئن کاسٹ کیا۔
اس کے بعد انہوں نے کئی فلمیں کیں، مگر ابتدائی فلموں سے انہیں خاص پہچان نہیں ملی۔
آخر کار ان کا انتظار ختم ہوا 1957 میں جب فلم پیاسا ریلیز ہوئی۔
یہ فلم مالا سنہا کے کیریئر کی سب سے بڑی ہٹ فلم ثابت ہوئی اور اسی فلم نے انہیں بالی ووڈ میں ایک مضبوط مقام دلایا۔
اس فلم میں وہ گرو دت کے ساتھ نظر آئیں۔
یہی ان کے فلمی سفر کا سنہری موڑ بن گیا۔

مالا سنہا اپنے دور کی ایک نہایت کامیاب اداکارہ تھیں۔
وہ فلموں کے لیے خاطر خواہ معاوضہ لیا کرتی تھیں اور اپنے وقت کی ٹاپ ہیروئنز میں شمار ہوتی تھیں۔
اپنی ماں کی طرح ان کی بیٹی پرتیبھاا سنہا بھی اداکارہ بننا چاہتی تھیں۔
اسی خواہش کے تحت انہوں نے بھی بالی ووڈ میں قدم رکھا، مگر قسمت نے ان کا ساتھ نہیں دیا اور انہیں وہ کامیابی حاصل نہ ہو سکی جو ان کی والدہ کو ملی تھی۔
بیٹی کی ناکامی سے مالا سنہا بہت رنجیدہ ہو گئیں۔
اس کے بعد انہوں نے فلمی تقریبات اور پارٹیز میں جانا بند کر دیا اور آہستہ آہستہ فلمی دنیا سے کنارہ کشی اختیار کر لی۔

انہوں نے سو سے زیادہ فلموں میں کام کیا، جن میں پیاسا (1957)، دھول کا پھول (1959)، ان پڑھ اور دل تیرا دیوانہ (1962)، گمراہ، بہو رانی، گہرا داغ (1963)، ہمالیہ کی گود میں (1965) وغیرہ نمایاں ہیں۔
انہیں اکثر دھرمندر، راج کمار، راجندر کمار، بسوجیت، کشور کمار، منوج کمار اور راجیش کھنہ جیسے بڑے اداکاروں کے ساتھ کام کرنے کا موقع ملا۔
سال 1957 میں مشہور اداکار اور ہدایت کار گرو دت نے اپنی فلم پیاسا میں مالا سنہا کو لیا۔
اس کردار کے لیے پہلے وہ مدھوبالا کو لینا چاہتے تھے، مگر مدھوبالا کے انکار کے بعد یہ رول مالا سنہا کو ملا۔

اس کے بعد ان کی فلم پھر صبح ہوگی (1958) اور یش چوپڑا کی ہدایت میں بنی دھول کا پھول (1959) نے انہیں شہرت کی بلندیوں پر پہنچا دیا۔
1958 سے 1960 کی دہائی کے آغاز تک وہ کئی کامیاب فلموں میں جیسے پرورش (1958)، اجالا، میں نشے میں ہوں، دنیا نہ مانے، لو میرج (1959)، بیوقوف (1960)، مایا (1961)، ہریالی اور راستہ، دل تیرا دیوانہ (1962)، ان پڑھ اور بمبئی کا چور (1962) وغیرہ میں نظر آئیں1960 اور 1970 کی دہائی میں انہوں نے اپنے دور کے بڑے ستاروں جیسے راج کپور، دیو آنند، کشور کمار، پردیپ کمار کے ساتھ بھی کام کیا۔
نئے ابھرتے ہوئے اداکاروں شمی کپور، راجندر کمار، راج کمار، منوج کمار، دھرمندر، راجیش کھنہ، سنیل دت، سنجے خان، جیتندر اور امیتابھ بچن کے ساتھ بھی کئی یادگار فلمیں کیں۔
جب مالا سنہا بالی ووڈ میں کامیابی کی سیڑھیاں چڑھ رہی تھیں، تبھی انہیں نیپالی فلم انڈسٹری سے بھی آفر آنے لگے۔
1966 میں انہوں نے نیپال جا کر اپنی پہلی اور واحد نیپالی فلم ماٹی گھر میں کام کیا۔
اس فلم کے ہیرو چدمبر پرساد لوہانی تھے، جو ایک اسٹیٹ کمپنی کے مالک بھی تھے۔
اسی فلم کی شوٹنگ کے دوران مالا کو اپنے کو اسٹار چدمبر پرساد لوہانی سے محبت ہو گئی۔
مگر شادی کے لیے دونوں کے خاندان نے دو شرطیں رکھ دیں کہ شادی کے بعد مالا فلموں میں کام نہیں کریں گی۔
شادی باقاعدہ مذہبی رسومات کے مطابق ہوگی۔
مالا نے دونوں شرطیں مان لیں، اور یوں دونوں کی شادی خاندان کی رضامندی سے ہو گئی۔
لیکن اس شادی کی ایک منفرد بات یہ تھی کہ مالا کو اپنے شوہر سے تین بار شادی کرنی پڑی پہلی بار عیسائی طریقے سے،دوسری بار ہندو رسم و رواج کے مطابق اور تیسری بار کورٹ میرج کی۔
شادی کے بعد جب چدمبر پرساد نے دیکھا کہ مالا اداکاری کے لیے کتنی پرجوش ہیں، تو انہوں نے خود ہی انہیں فلموں میں کام جاری رکھنے کے لیے کہا۔
اپنے خداداد حسن اور فنکارانہ صلاحیتوں کے سبب مالا سنہا نے نہ صرف فلم شائقین کے دلوں پر راج کیا بلکہ ہندوستانی سینما پراپنی اداکاری کے انمٹ نقوش بھی مرتسم کیے۔

یو این آئی۔
این یو۔