رامپور 17 نومبر(یواین آئی) اتر پردیش میں رامپور کی ایک خصوصی عدالت نے دو پین کارڈ رکھنے کے معاملے میں سماج وادی پارٹی (ایس پی) کے سینئر رہنما محمد اعظم خان اور ان کے بیٹے سابق ایم ایل اے عبداللہ اعظم کو سات سات سال قید کی سزا سنائی ہے عدالت نے اعظم اور عبداللہ کو دو پین کارڈ رکھنے کے الزام میں قصوروار قرار دیا ہے۔ سزا کے پیش نظر، عدالت نے دونوں کو عدالتی تحویل میں بھیجنے کا حکم دیا ہے۔ شہر کے ایم ایل اے آکاش سکسینہ اس معاملے میں مدعی ہیں۔ انہوں نے یہ کیس سال 2019 میں درج کرایا تھا۔ اس معاملے میں چھ سال بعد فیصلہ آیا ہے۔
آکاش سکسینہ نے سال 2019 میں سول لائنز تھانے میں عبداللہ اعظم کے خلاف کیس درج کرایا تھا۔ اس میں الزام تھا کہ عبداللہ اعظم نے دو مختلف پیدائشی سرٹیفکیٹس کی بنیاد پر دو پین کارڈ بنوائے۔ الزام یہ بھی تھا کہ اعظم خان کے کہنے پر عبداللہ نے وقتًا فوقتاً دونوں پین کارڈ کا استعمال بھی کیا۔ کیس کا ٹرائل ایم پی-ایم ایل اے مجسٹریٹ کورٹ میں چل رہا تھا۔ اس میں دونوں فریقوں کی جانب سے بحث مکمل ہو چکی تھی۔ عدالت کو اپنا فیصلہ سنانا تھا، اس کے لیے اعظم خان اور عبداللہ اعظم دونوں کو طلب کیا گیا۔ دوپہر کے بعد اعظم خان اور عبداللہ اعظم عدالت میں پیش ہوئے۔
ایم پی-ایم ایل اے مجسٹریٹ کورٹ کے شوبھت بنسل نے اعظم خان اور ان کے بیٹے عبداللہ اعظم کو دھوکہ دہی میں قصوروار قرار دیا۔ اے ڈی جی سی سندیپ سکسینہ نے بتایا کہ اس معاملے میں عدالت نے دونوں کو سات سات سال قید کی سزا سنائی ہے۔ ساتھ ہی 50 ہزار روپے کا جرمانہ بھی لگایا ہے۔
شہر سے بی جے پی کے ایم ایل اے آکاش سکسینہ نے کہا کہ دو پین کارڈ کے معاملے میں اعظم خان اور ان کے بیٹے عبداللہ اعظم دونوں کو سات سات سال کی سزا ہوئی ہے۔ انہوں نے کہا کہ خواہ دو پین کارڈ کا معاملہ ہو یا کوئی بھی دیگر معاملہ ہو، سبھی میں دستاویزی ثبوت (پیپر ایویڈنس) کی بنیاد پر مضبوطی سے پیروی کی گئی ہے اور یہ سچائی کی جیت ہے۔ انہیں عدلیہ کے ہر فیصلے پر مکمل بھروسہ ہے۔
یواین آئی۔ولی