نئی دہلی، 10 جون (یواین آئی) کانگریس صدر ملکارجن کھرگے نے وزیر اعظم نریندر مودی کو خط لکھ کر لوک سبھا میں نائب اسپیکر کے عہدے پر تقرری کے لیے جلد از جلد عمل شروع کرنے کی درخواست کی ہے اور کہا ہے کہ یہ آئینی انتظام ہے، اس لیے اس سمت میں فوری اقدامات اٹھانا ضروری ہیں کھرگے نے کہا کہ آئین میں لوک سبھا میں اسپیکر اور نائب اسپیکر کے عہدوں کے لیے بندوبست کیا گیا ہے، لیکن جب سے مودی حکومت اقتدار میں آئی ہے، اس آئینی التزام کو نظر انداز کیا جا رہا ہے۔ ان کا کہنا تھا کہ پچھلی دو لوک سبھاؤں میں اس عہدے کو خالی رکھا گیا اور اب بھی وہی کوشش کی جا رہی ہے جو کہ غلط ہے، اس لیے حکومت کو اس سمت فوری اقدامات اٹھانے چاہئیں۔
انہوں نے لکھا، ’’پہلی سے سولہویں لوک سبھا تک، ہر ایوان میں ایک نائب اسپیکر رہا ہے۔ عمومی طور پر، اہم اپوزیشن پارٹی کے ارکان میں سے نائب اسپیکر کی تقرری ایک قائم شدہ روایت رہی ہے۔ تاہم، آزاد ہندوستان کی تاریخ میں پہلی بار یہ عہدہ مسلسل دو لوک سبھا کی مدت میں خالی رہا ہے۔ سترہویں لوک سبھا کے دوران کوئی نائب اسپیکر منتخب نہیں کیا گیا تھا اور یہ تشویشناک مثال موجودہ اٹھارہویں لوک سبھا میں بھی جاری ہے۔ یہ ہندوستان کی جمہوری سیاست کے لیے اچھا شگون نہیں ہے اور گہرائی سے غوروخوض کے بعد بنائے گئے آئین کے ضوابط کی بھی خلاف ورزی ہے۔‘‘
کانگریس صدر نے کہا کہ آئین کی دفعہ 93 کے تحت پارلیمنٹ میں اسپیکر اور نائب اسپیکر کے عہدوں پر تقرری ضروری ہے۔ حکومت کو ایوان کی جمہوری اقدار کو برقرار رکھنے کے لیے نائب اسپیکر کی تقرری کا عمل جلد از جلد شروع کرنا چاہیے۔
یواین آئی ۔ایف اے