نئی دہلی، 17نومبر(یو این آئی) مکہ مدینہ شاہراہ پر ہونے والا دل خراش بس حادثہ پورے ملک کو ہلا کر رکھ دینے والا ہے دہلی حج کمیٹی کی چیئرپرسن کوثر جہاں نے حادثے پر گہرے رنج و غم کا اظہار کرتے ہوئے کہا کہ مرکزی حکومت متاثرہ خاندانوں تک مدد پہنچانے کے لیے ہر ممکن کوشش کر رہی ہے جاری ریلیز کے مطابق کوثر جہاں نے قونصل جنرل سے بات کرکے واقعے کی مکمل معلومات حاصل کی ہیں۔ انہوں نے کہا کہ یہ نہایت افسوسناک سانحہ ہے اور ہمارا دل بے حد مغموم ہے۔ قابلِ ذکر ہے کہ یہ حادثہ عمرہ زائرین کو مکہ سے مدینہ لے جاری بس کے ساتھ مدینہ سے 40 کلو میٹر کے فاصلے پر پیش آیا۔
کوثر جہاں نے کہا کہ ہم متاثرہ خاندانوں سے رابطہ قائم کرنے کی کوشش کر رہے ہیں۔ جاں بحق افراد کی شناخت کا عمل جاری ہے۔ مرکزی حکومت مسلسل صورتِ حال پر نظر رکھے ہوئے ہے اور وہاں موجود ہندوستانی سفارت خانہ اور متعلقہ حکام کے ساتھ مسلسل رابطے میں ہے۔ ہر ممکن امداد فراہم کرنے کے لیے تمام کوششیں جاری ہیں۔کوثر جہاں نے بتایا کہ ان کی خود قونصل جنرل سے بات ہوئی ہے اور وہ اپنی پوری امدادی ٹیم کے ساتھ فوری طور پر جائے حادثہ کے لیے روانہ ہو چکے ہیں۔
ہندوستانی قونصلیٹ جنرل نے 24 گھنٹے سرگرم کنٹرول روم قائم کیا ہے۔ اس کے علاوہ ریاض اور جدہ میں موجود ہندوستانی مشن میں بھی کنٹرول روم قائم کیے گئے ہیں۔ مرکزی حکومت نے ہیلپ لائن نمبر جاری کیے ہیں تاکہ متاثرہ خاندانوں سے فوری رابطہ قائم کرکے انہیں ہر ممکن مدد فراہم کی جاسکے۔حادثے سے متعلق تمام حقائق اور حالات جمع کیے جا رہے ہیں۔ حکومت کی سب سے بڑی ترجیح متاثرین اور ان کے اہلِ خانہ تک جلد از جلد مدد پہنچانا ہے۔
کوثر جہاں نے کہا کہ اس مشکل گھڑی میں پورا ملک سوگوار خاندانوں کے ساتھ کھڑا ہے۔ دعا ہے کہ اللہ تعالیٰ متاثرہ خاندانوں کو اس صدمے کو برداشت کرنے کی طاقت عطا فرمائے۔
یو این آئی۔ ع ا۔