سری نگر، 25 اپریل (یو این آئی) کانگریس کے سینئر لیڈر اور پارلیمنٹ میں اپوزیشن کے لیڈر راہل گاندھی کا کہنا ہے کہ جموں وکشمیر کے تمام لوگوں نے پہلگام میں پیش آنے والے بہیمانہ واقعے کی شدید مذمت کی ہے اور اس وقت قوم کی بھر پور حمایت کر رہے ہیں انہوں نے کہا: 'میں سب کو یہ بتانا چاہتا ہوں کہ اس وقت پوری قوم متحد ہے'۔ان کا کہنا ہے کہ پہلگام واقعے کو انجام دینے کا مقصد سماج کو تقسیم کرنا ہے۔موصوف لیڈر نے ان باتوں کا اظہار جمعہ کو یہاں ایک مختصر پریس کانفرنس سے خطاب کرنے کے دوران کیا۔
انہوں نے کہا: 'میں یہاں صورتحال کا جائزہ لینے اور اپنی طرف سے بھر پور مدد فراہم کرنے کے لئے آیا'۔
ان کا کہنا تھا: 'جموں وکشمیر کے تمام لوگوں نے اس بہیمانہ واقعے کی مذمت کی ہے اور اس وقت پوری قوم کی حمایت کر رہے ہیں'۔
مسٹر گاندھی نے کہا: 'میں زخمیوں میں سے ایک زخمی سے ملا، باقی زخمیوں اور ان کے اہلخانہ سے نہ مل سکا کیونکہ وہ واپس چلے گئے ہیں تاہم جنہوں نے اس واقعے میں اپنے پیاروں کوکھویاہے ان کے لئے میرا پیار اور محبت'۔
انہوں نے کہا: 'میں سب کو یہ بتانا چاہتا ہوں کہ اس وقت پوری قوم متحد ہے'۔
کانگریس لیڈر نے کہا: 'گذشتہ روز ہماری حکومت کے ساتھ میٹنگ ہوئی، متحدہ اپوزیشن کی حیثیت سے ہم نے اس کارروائی کی مذمت کی اور کہا کہ حکومت جو بھی اقدام کرنا چاہتی ہے ہم اس کے ساتھ کھڑے ہیں'۔
ان کا کہنا تھا: 'جو کچھ پہلگام میں ہوا اس کا مقصد سماج کو تقسیم کرنا ہے اور بھائی کو بھائی سے لڑانا ہے تاہم اس وقت ضرورت اس بات کی ہے کہ ہر ہندوستانی ایک ہوجائے تاکہ دہشت گردوں کے عزائم کو ناکام بنایا جا سکے'۔
ان کا کہنا ہے: 'یہ دیکھ کر افسوس ہو رہا ہے کہ ملک میں کچھ لوگ میرے کشمیر کے بھائیوں اور بہنوں پر حملے کر رہے ہیں اس وقت ایک ہو کر دہشت گردی سے نمٹنے کی بہت ضرورت ہے'۔
ایک سوال کا جواب دیتے ہوئے لیڈر آف اپوزیشن نے کہا: 'میں وزیر اعلیٰ عمر عبداللہ اور لیفٹیننٹ گورنر منوج سنہا سے بھی ملا انہوں نے مجھے اس واقعے سے متعلق بریفنگ دی'۔
انہوں نے کہا: 'میں نے انہیں اپنی اور اپنی پارٹی کی طرف سے بھر پور حمایت دینے کی یقین دہانی کی'۔
قابل ذکر ہے کہ راہل گاندھی جمعہ کے روز اپنے ایک روزہ دورہ پر سری نگر پہنچے۔
یو این آئی ایم افضل