سری نگر،9مئی(یو این آئی) سری نگر ایئرپورٹ اور جنوبی کشمیر میں قائم اونتی پورہ ایئر بیس کو دشمن کی طرف سے نشانہ بنانے کی کوشش کی گئی تاہم، سیکیورٹی فورسز کی بروقت اور مستعد کارروائی کے باعث ان حملوں کو کامیاب نہیں ہونے دیا گیا ذرائع نے بتایا کہ شمالی کشمیر کے بارہمولہ ضلع میں بھی پاکستانی ڈرونز کی سرگرمی دیکھی گئی جس پر فضائی دفاعی نظام نے فوری ردعمل دیتے ہوئے ان ڈرونز کو فضا میں ہی تباہ کر دیا۔ اس کارروائی کے دوران آسمان روشنیوں سے چمک اٹھا، جس سے شہریوں میں خوف و ہراس کی لہر دوڑ گئی۔
قبل ازیں شام کے وقت جموں، سانبہ، اور پٹھان کوٹ کے علاقوں میں بھی ڈرونز کی پرواز دیکھی گئی تھی۔ اس کے بعد ادھم پور، نگروٹہ اور پنجاب کے مختلف سرحدی علاقوں میں بھی پاکستانی ڈرونز کی موجودگی رپورٹ ہوئی، جن کے خلاف دفاعی کارروائیاں جاری ہیں۔
حکام کا کہنا ہے کہ سری نگر میں مساجد کے لاوڈ اسپیکرز کے ذریعے عوام سے اپیل کی گئی کہ وہ فوراً روشنی بند کر دیں اور گھروں کے اندر رہیں۔ اسی دوران جموں و کشمیر کے کئی علاقوں بشمول جنوبی کشمیر میں سائرن بجنے لگے اور مکمل بلیک آؤٹ نافذ کر دیا گیا تاکہ ممکنہ فضائی خطرات سے بچاؤ ممکن ہو سکے۔
دفاعی مبصرین کے مطابق پاکستان کی طرف سے مسلسل ڈرون دراندازی اور فضائی حدود کی خلاف ورزی نہ صرف جنگ بندی معاہدے کی سنگین خلاف ورزی ہے بلکہ علاقائی سلامتی کے لیے ایک واضح خطرہ بھی ہے۔ ہندوستانی سیکیورٹی اداروں کو ہائی الرٹ پر رکھا گیا ہے اور سرحدی علاقوں میں نگرانی مزید سخت کر دی گئی ہے۔
حکام نے عوام سے پرزور اپیل کی ہے کہ وہ افواہوں سے گریز کریں، سرکاری ہدایات پر عمل کریں اور کسی بھی ہنگامی صورتحال میں مقامی انتظامیہ سے رابطہ کریں۔
یو این آئی-ارشید بٹ