نئی دہلی، 2 ستمبر (یو این آئی) ہندستان اور افغانستان نے تجارت اور اقتصادی تعاون کے حوالے سے تازہ بات چیت کے دوران مختلف شعبوں میں ادارہ جاتی تعاون کو مضبوط بنانے اور شناخت شدہ شعبوں میں مزید کارروائی کرنے پر اتفاق کیا ہے شناخت شدہ شعبوں میں کسٹمز اور اعداد و شمار کے تبادلے میں تعاون بڑھانا، ادویہ سازی اور زراعت کے شعبوں میں ضابطہ جاتی تعاون، تجارتی رابطوں کو بہتر بنانا اور سرمایہ کاری کے ساتھ ساتھ کاروبار سے کاروبار کے درمیان روابط کو فروغ دینا شامل ہے۔
تجارت، صنعت و سرمایہ کاری سے متعلق ہندستان-افغانستان مشترکہ ورکنگ گروپ (جے ڈبلیو جی) کی میٹنگ منگل کو ویڈیو کانفرنس کے ذریعے منعقد ہوئی۔ اس اجلاس میں ہندستان اور افغانستان کے حکام نے شرکت کی، جن میں تجارت، صنعت، کسٹمز، ضابطہ ساز اداروں اور سفارتی مشنوں کے نمائندے شامل تھے۔
وزارت تجارت و صنعت کی جانب سے بدھ کو جاری ایک بیان کے مطابق، دونوں فریق ادارہ جاتی تعاون کو مضبوط بنانے اور نشان زد شعبوں میں مزید اقدامات کرنے پر متفق ہوئے۔ دونوں جانب سے دو طرفہ تجارت اور اقتصادی تعاون سے متعلق مختلف امور کا جائزہ لیا گیا اور تجارت کو مزید آسان بنانے کے ساتھ ساتھ دونوں ممالک کے درمیان تجارتی تعلقات کو مضبوط کرنے کے اقدامات پر تبادلۂ خیال کیا گیا۔
بات چیت میں تجارت میں آسانی اور کسٹمز تعاون، افغان تاجروں کے لیے ویزا کی سہولت، بینکاری اور مالیاتی تعاون، ادویات اور زرعی تجارت، توانائی کے شعبے میں تعاون، سرمایہ کاری اور تجارت کے فروغ، محصولات میں رعایت، مال برداری کے رابطوں اور بندرگاہ سے متعلق امور شامل تھے۔
دونوں فریقوں نے ہندستان-افغانستان تجارت، صنعت اور سرمایہ کاری کے تعلقات کو مزید مضبوط بنانے کے اپنے عزم کا اعادہ کیا اور اہم امور پر مسلسل بات چیت جاری رکھنے پر اتفاق کیا۔
یو این آئی۔ا یم جے