نئی دہلی، 10 جون (یو این آئی) کامرس اینڈ انڈستری کے مرکزی وزیر پیوش گوئل نے ہندوستان-سوئٹزرلینڈ اقتصادی شراکت کو مزید وسعت دینے کے لیے سوئس صنعتی دنیا کے ساتھ بات چیت کی ہے اور ان سے اپیل کی کہ وہ ہندوستان کو مینوفیکچرنگ، ہنر اور اختراع کے لیے ایک اسٹریٹجک مرکز کے طور پر دیکھیں اور ملک میں ابھرتے ہوئے مواقع سے فائدہ اٹھائیں منگل کو کامرس اور صنعت کی وزارت کی طرف سے جاری کردہ ایک ریلیز کے مطابق سوئٹزرلینڈ کے دو روزہ دورے پر گئے مسٹر گوئل نے پیر کو برن میں صنعت کاروں اور سرمایہ کاروں کے ساتھ کئی میٹنگیں کیں تاکہ وہاں کی کمپنیوں کے ساتھ ہندوستان-سوئٹزرلینڈ اقتصادی شراکت داری کو وسعت دی جا سکے۔ یہ ملاقاتیں ہندوستان اور یورپی فری ٹریڈ ایسوسی ایشن (ای ایف ٹی اے) کے درمیان تجارتی اور اقتصادی شراکت داری کے معاہدے (ٹی ای پی اے) کے تحت تعاون کی نئی راہیں تلاش کرنے کے لیے تھیں۔
اس معاہدے پر حال ہی میں دستخط کئے گئے ہیں۔
مسٹر گوئل نے سوئٹزرلینڈ کے مختلف شعبوں کے سرکردہ صنعت کاروں سے ملاقات کی۔ ان میٹنگوں کے دوران، جدت، ٹیکنالوجی کی منتقلی اور پائیدار مینوفیکچرنگ پر خصوصی زور دینے کے ساتھ ساتھ ہندوستانی اور سوئس کاروباری اداروں کے درمیان ہم آہنگی کو بڑھانے پر توجہ دی گئی۔ انہوں نے سوئس کمپنیوں کو دعوت دی کہ وہ ہندوستان میں توسیع کریں اور ملک کی متحرک اور تیزی سے بڑھتی ہوئی مارکیٹ سے فائدہ اٹھائیں۔
ریلیز میں کہا گیا ہے کہ مسٹر گوئل کے ساتھ مختلف ملاقاتوں میں کئی سوئس کمپنیوں نے مشترکہ منصوبے شروع کرنے، آپریشنز کو وسعت دینے اور ہندوستانی اور بین الاقوامی دونوں منڈیوں کے لیے پیداوار کو مقامی بنانے کے لیے کام کرنے میں دلچسپی ظاہر کی۔
سوئس کمپنیوں نے کینسر کے علاج اور سیل سائنس کے جدید ترین طریقوں سے لے کر صنعتی آٹومیشن، فائبر آپٹکس، خلائی ٹیکنالوجی اور ڈیجیٹل سیکورٹی تک، ہندوستان کی ترقیاتی ترجیحات اور شعبہ جاتی ترقیاتی منصوبوں کے مشترکہ مقاصد کے لیے مل کر کام کرنے کے خیال پر زور دیا۔ یہ جذبہ اسی طرح کے اسٹریٹجک اور طویل مدتی وعدوں میں شامل ہے۔
میٹنگوں میں کئی شرکاء نے ہندوستان کو سوئٹزرلینڈ کا فطری ساتھی قرار دیا۔
مسٹر گوئل نے انہیں ہندوستان میں کاروبار کرنے میں آسانی اور پالیسی کے استحکام کا یقین دلایا۔ ریلیز کے مطابق وزیر تجارت نے وہاں کے تاجروں کی حوصلہ افزائی کی کہ وہ ہندوستان کو نہ صرف ایک مارکیٹ کے طور پر بلکہ مینوفیکچرنگ، ٹیلنٹ اور اختراع کے لیے ایک اسٹریٹجک مرکز کے طور پر بھی دیکھیں۔
اس دورے کے دوران مسٹر گوئل نے مختلف شعبوں کے صنعت کے رہنماؤں کے ساتھ دو گول میز میٹنگوں کی صدارت کی، جس میں بائیو ٹیکنالوجی اور فارماسیوٹیکل، صحت کی دیکھ بھال کی خدمات اور انجینئرنگ، دفاع اور ابھرتی ہوئی ٹیکنالوجی کے میدان میں ڈیزائن، ترقی اور مینوفیکچرنگ پر توجہ دی گئی۔
سوئٹزرلینڈ میں ہندوستانی سفارت خانے کے تعاون سے منعقد کیے گئے ان سیشنوں میں ہندوستان کی صلاحیتوں اور اختراع کے ابھرتے ہوئے ماحول پر روشنی ڈالی گئی۔
مسٹر گوئل نے سوئٹزرلینڈ کے تاجروں سے انویسٹ انڈیا میں وقف ای ایف ٹی اے ڈیسک سے فائدہ اٹھانے کی اپیل کی اور ساتھ ہی ریگولیٹری ہم آہنگی اور باہمی شناخت سے متعلق معاہدوں کے لیے کام کرنے کے لیے ہندوستان کی آمادگی کی تصدیق کی۔
انہوں نے وہاں انسٹی ٹیوٹ آف چارٹرڈ اکاؤنٹنٹس آف انڈیا (آئی سی اے آئی) برانچ کے اراکین سے بھی ملاقات کی اور ہندوستان اور سوئٹزرلینڈ کے درمیان پیشہ ورانہ اور کاروباری ماحول کو مضبوط بنانے کے لیے برانچ کی تعریف کی۔
ریلیز کے مطابق میٹنگوں کے دوران، بائیو ٹیکنالوجی، ڈیزائن، ترقی اور مینوفیکچرنگ، صحت کی دیکھ بھال کی خدمات، آٹومیشن، دفاع، سائبر سیکورٹی اور اعلی درجے کے مواد سمیت متنوع شعبوں سے تعلق رکھنے والی سوئس کمپنیوں نے ایک عالمی اقتصادی پاور ہاؤس اور اختراع پر مبنی ترقی کے مرکز کے طور پر ہندوستان کی ترقی پر اپنے مضبوط اعتماد کا اظہار کیا۔
ریلیز کے مطابق بہت سی کمپنیوں کے نمائندوں نے مستقبل میں ہندوستان میں سرمایہ کاری کرنے اور اسے اپنی کاروباری سرگرمیوں کے عالمی سلسلہ کے ایک مرکز کے طور پر قائم کرنے کی خواہش ظاہر کی ہے۔
یو این آئی م ع۔ 1510