نئی دہلی، 8 اپریل (یو این آئی) کانگریس کی سینیر لیڈر اور سابق وزیر محترمہ محسنہ قدوائی کا 8 اپریل 2026 کو دہلی کے ایک پرائیویٹ اسپتال میں انتقال ہو گیا ان کے انتقال پر غالب انسٹی ٹیوٹ کے چیئرمین جسٹس بدر در ریز احمد نے اظہار تعزیت کرتے ہوئے کہا کہ وہ ایک قابل وزیر حوصلہ مند خاتون تھیں، ان کے انتقال سے تہذیبی سطح پر بھی ایک خلا پیدا ہوا ہے، جس کا اندازہ آنے والے وقت میں شدت سے محسوس ہوگا۔ انھوں نے کہا کہ وہ غالب انسٹی ٹیوٹ سے گہری وابستگی رکھتی تھیں اور بہت اہم مسائل میں انھوں نے اس ادارے کی مدد بھی کی۔ میں ان کے خانوادے کو تعزیت پیش کرتا ہوں اور ان کے بلندی درجات کے لیے دعا گو ہوں۔
غالب انسٹی ٹیوٹ کے سکریٹری پروفیسر صدیق الرحمٰن قدوائی نے گہرے رنج و غم کا اظہار کرتے ہوئے کہا کہ بیگم محسنہ قدوائی نہ صرف انڈین نیشنل کانگریس کی ایک تجربہ کار اور اہم سیاسی شخصیت تھیں بلکہ درد مند اور منصوبہ ساز شخصیت بھی تھیں، جنہوں نے عوامی خدمت، سماجی بہبود اور قومی سطح پر مسلسل خدمات انجام دیں۔ میرے لیے ذاتی طور پر اور غالب انسٹی ٹیوٹ کے لیے بھی ان کا انتقال ایک بڑا نقصان ہے۔
غالب انسٹی ٹیوٹ کے ڈائرکٹر ڈاکٹر ادریس احمد نے اظہار تعزیت کرتے ہوئے کہا کہ مرحومہ کی خدمات کو ہمیشہ یاد رکھا جائے گا اور ان کے ذریعے جو قدم اٹھاۓ گئے ان پر مسلسل عمل اصل خراج عقیدت ہے۔ انھوں نے غالب انسٹی ٹیوٹ کی فلاح و ترقی کے جو کوششیں کیں، ان کو یہ ادارہ اور اس کے وابستگان کبھی فراموش نہیں کرسکتے۔اس مشکل وقت میں یہ ادارہ اور اس کے تمام وابستگان ان کے خانوادے سے اظہار تعزیتی کرتے ہیں اور ان کے غم میں برابر کے شریک ہیں۔ خدا ان کی روح کو جنت الفردوس میں اعلیٰ مقام عطا کرے اور پسماندگان کو صبر جمیل عطا کرے۔
یو این آئی۔ ایف اے۔ م الف