EntertainmentPosted at: Aug 18 2026 3:16PM

اردو شاعری کو نئی جہت دینے والے عظیم شاعر ونغمہ نگار:گلزار

سالگرہ 18 اگست کے موقع پر
ممبئی ، 18اگست (یو این آئی) گلزار اردو اور ہندی ادب و فلمی دنیا کا ایک ایسا معتبر نام ہیں جنہوں نے اپنی منفرد طرزِ اظہار، جدید تشبیہوں اور گہری علامتوں کے ذریعے شاعری اور نغمہ نگاری کو ایک نئی جہت عطا کی۔
ان کا اصل نام سمپورن سنگھ کالرا ہے۔
وہ شاعر، نغمہ نگار، کہانی نویس، مکالمہ نگار، فلم ساز اور ہدایت کار کی حیثیت سے کئی دہائیوں سے برصغیر کے ادبی اور فلمی منظرنامے پر نمایاں ہیں۔
گلزار کی شاعری میں روزمرہ زندگی کے معمولی واقعات بھی ایک گہری معنویت اختیار کر لیتے ہیں۔
وہ محبت، تنہائی، یاد، جدائی، وقت، رشتوں اور انسانی جذبات کو نہایت سادہ مگر اثر انگیز انداز میں بیان کرتے ہیں۔
ان کے ہاں الفاظ محض اظہار کا وسیلہ نہیں بلکہ احساس، منظر اور کیفیت پیدا کرنے کا ذریعہ بن جاتے ہیں۔
ان کی نغمہ نگاری کی سب سے نمایاں خصوصیت یہ ہے کہ وہ عام بول چال کے الفاظ کو بھی شعری حسن عطا کر دیتے ہیں۔
ان کے لکھے ہوئے گیتوں میں کلاسیکی اردو کی نزاکت، ہندی کی سادگی اور پنجابی و ہندوستانی تہذیب کی خوشبو ایک ساتھ محسوس ہوتی ہے۔
فلمی دنیا میں گلزار نے متعدد یادگار گیت لکھے۔
’میرا کچھ سامان‘، ’تجھ سے ناراض نہیں زندگی‘، ’دل ڈھونڈتا ہے‘، ’وہ شام کچھ عجیب تھی‘ اور ’تم آ گئے ہو نور آ گیا ہے‘ جیسے نغمے ان کے منفرد شعری اسلوب کی مثال ہیں۔
ان کے گیت محض فلمی گیت نہیں رہتے بلکہ انسانی جذبات کی ایسی ترجمانی بن جاتے ہیں جو فلم سے باہر بھی اپنی معنویت برقرار رکھتے ہیں۔
گلزار کی شاعری میں خاموشی بھی ایک زبان بن جاتی ہے۔
وہ براہِ راست جذبات بیان کرنے کے بجائے اکثر اشاروں، استعاروں اور تصویری پیکروں کے ذریعے بات کرتے ہیں۔
یہی انداز انہیں اپنے ہم عصر شعرا اور نغمہ نگاروں سے منفرد بناتا ہے۔

ان کی ادبی اور فلمی خدمات کے اعتراف میں انہیں متعدد بڑے اعزازات سے نوازا گیا، جن میں دادر صاحب پھالکے ایوارڈ، پدم بھوشن، ساہتیہ اکادمی ایوارڈ اور کئی فلم فیئر ایوارڈ شامل ہیں۔
انہیں فلم ’سلم ڈاگ ملینیئر‘ کے گیت ’جے ہو‘ کے لیے آسکر اور گریمی ایوارڈ بھی ملا۔

گلزار کی شخصیت اس اعتبار سے بھی منفرد ہے کہ انہوں نے اردو شاعری کی روایتی لطافت کو برقرار رکھتے ہوئے اسے جدید زندگی، شہری احساسات اور بدلتے ہوئے انسانی رشتوں سے جوڑا۔
ان کا شعری اسلوب ثابت کرتا ہے کہ سادہ لفظ بھی گہرا فلسفہ بیان کر سکتا ہے۔

گلزار صرف ایک نغمہ نگار نہیں، بلکہ الفاظ کے ایسے فن کار ہیں جنہوں نے محبت، یاد اور تنہائی کو نئے استعارے دیے اور اردو شاعری کو جدید عہد کے احساس سے ہم آہنگ کیا۔
مشاعروں اور محفلوں سے ملی شہرت اور کامیابی نے موٹر میکینک کا کام کرنے والے گلزار کو گزشتہ چار دہائی میں فلمی دنیا کا ایک عظیم شاعر اور نغمہ نگار بنا دیا ہے۔

اردو شاعری کو ایک نئی جہت دینے والے ہندستان کے مشہور نغمہ نگار اور ہدایتکار گلزار پاکستان کے ضلع جہلم کے ایک چھوٹے سے قصبے دینہ میں کالرا ارورہ سکھ خاندان میں 18 اگست 1936 کو پیدا ہوئے ۔
سمپورن سنگھ کالرا (گلزار) کو اسکول کے دنوں سے ہی شعر و شاعری اورساز موسیقی کا بے حد شوق تھا۔
کالج کے دنوں میں ان کا یہ شوق روز و افزوں بڑھنے لگا اور وہ اکثر مشہور ستار نواز روی شنکر اور سرود نواز علی اکبر خان کے پروگراموں میں جایا کرتے تھے۔

ہندستان کی تقسیم کے بعد گلزار کا خاندان امرتسر میں بس گیا لیکن گلزار نے اپنے خواب کو پورا کرنے کے لئے ممبئی کا رخ کیا اور ورلي میں ایک گیراج میں کار مكینك کے طور پر کام کرنے لگے۔
فرصت کے لمحات میں وہ نظمیں لکھا کرتے تھے۔
اسی دوران وہ ڈائرکٹر بمل رائے کے رابطے میں آئے اور ان کے اسسٹنٹ بن گئے۔
بعد میں انہوں نے ڈائریکٹر رشی کیش مکھرجی اور ہیمنت کمار کے اسسٹنٹ طور پر بھی کام کیا۔

اس کے بعد شاعر کے طور پر گلزار پروگریسو رائٹرس ایسوسی ایشن (پی ڈبلیو اے ) سے منسلک ہوگئے۔
انہوں نے اپنے فلمی کیریئر کا آغاز 1961 میں ومل رائے کے اسسٹنٹ کے طور پر کیا۔
نغمہ نگار کے طور پر گلزار نے اپنا پہلا نغمہ ’’میرا گورا انگ لئی لے‘‘ 1963 میں ریلیز ومل رائے کی فلم بندنی کیلئے لکھا۔
گلزار نے بطور شاعر بے شمار فلموں میں نغمے لکھے، ان کی فلمی شاعری میں ایک اچھوتا پن پایا جاتا ہے۔
شاعری میں تشبیہات کا استعمال ان کے نغموں کو منفرد بناتا ہے۔

انہوں نے 1971 میں فلم ’’میرے اپنے‘‘کے ذریعے ہدایتکاری کے میدان میں بھی قدم رکھا۔
اس فلم کی کامیابی کے بعد کوشش، پریچے، اچانک، خوشبو، آندھی، موسم، کنارا، کتاب، نمکین، انگور، اجازت،لباس ، لیکن، ماچس اور ہو تو تو جیسی کئی فلموں کی ہدایتکاری کی۔

اپنے ابتدائی دنوں میں گلزار کاجھکاؤ بائیں بازو نظریات کی جانب تھا جو ’’میرے اپنے اور آندھی‘‘ جیسی فلموں میں ظاہر ہوتا ہے۔
آندھی میں ہندستانی سیاسی نظام کی بالواسطہ تنقید کی گئی تھی حالانکہ اس فلم پر کچھ وقت کے لئے پابندی بھی لگا دی گئی تھی۔

گلزار ادبی کہانیوں اور خیالات کو فلموں میں بخوبی پیش کرتے ہیں۔
ان کی فلم انگور شیکسپیئر کی کہانی "كامیڈي آف ایررس‘‘ فلم موسم اے جے كروننس کے ’’ جوڈاس ٹری‘‘ اور فلم پریچے ’’ہالی وڈ کی کلاسک فلم "دی ساؤنڈ آف میوزک‘‘پر مبنی تھی۔

راہل دیو برمن کی موسیقی میں بطور نغمہ نگار گلزار کی صلاحیت نكھر کر سامنے آئی اور انہوں نے ناظرین اور سامعین کو’’ مسافر ہوں یارو (پریچے)، تیرے بغیر زندگی سے کوئی شکوہ تو نہیں (آندھی)، گھر جائے گی (خوشبو)، میرا کچھ سامان (اجازت)،تجھ سے ناراض نہیں زندگی(معصوم) جیسے ادبی طرز کے نغمات دیئے۔
سنجیو کمار، جتیندر اور جیا بہادری کی اداکاری کو نکھارنے میں گلزار نے اہم کردار نبھایا تھا۔

ہدایت کے علاوہ گلزار نے کئی فلموں کی اسکرپٹ اور ڈائیلاگ بھی لکھے۔
اس کے علاوہ انہوں نے 1977 میں کتاب اور کنارا جیسی فلموں کی تخلیق بھی كي۔
اپنے نغموں کے لئے وہ اب تک 11 مرتبہ فلم فیئرایوارڈ اور تین مرتبہ قومی ایوارڈسے نوازے جا چکے ہیں۔

2009 میں فلم ’’سلم ڈاگ ملینیئر‘‘ میں ان کا نغمہ ’’جے ہو‘‘ کو اسكر ایوارڈ سے نوازا گیا۔
ہندوستانی سنیما میں ان کی شراکت کو دیکھتے ہوئے 2004 میں انہیں ملک کے تیسرے بڑے شہری اعزاز پدم بھوشن سے سرفراز کیا گیا۔

اردو زبان میں گلزار کی مختصر کہانیوں کا مجموعہ ’’دھواں‘‘ کو 2002 میں ساہیتہ اکیڈمی ایوارڈ بھی مل چکا ہے۔
گلزار نے اپنی شاعری کو ایک نئے انداز میں پیش کیا جسے ’’تروینی‘‘کہا جاتا ہے۔
ہندوستانی سنیما کی دنیا میں قابل ذکر شراکت کو دیکھتے ہوئے گلزار فلم انڈسٹری کے اعلی ترین اعزاز دادا صاحب پھالکے ایوارڈ سے بھی نوازے جا چکے ہیں۔

یو این آئی۔
این یو۔

Entertainment

انوراگ نے فلموں میں سماجی مسائل کو اٹھایا

’سانسوں کی مالا‘ بینا ترپاٹھی کا ترانہ بن گیا

’تارک مہتا کا الٹا چشمہ‘ کے لائیو کوئز میں لاکھوں ناظرین شریک، دہلی کی رنکی یادو فاتح

رانی مکھرجی کو راج کپور خصوصی تعاون ایوارڈ

اللو ارجن کے مداحوں نے 8 ریاستوں میں ایچ پی وی بیداری مہم چلائی

انوراگ نے فلموں میں سماجی مسائل کو اٹھایا

10 Sep 2026 | 3:46 PM

( 10 ستمبر سالگرہ کے موقع پر).