نئی دہلی، 10 نومبر (یو این آئی) عام آدمی پارٹی (عآپ) نے پیر کی شام دہلی میں لال قلعہ کے قریب ہوئے دھماکے پر شدید تشویش ظاہر کرتے ہوئے واقعے کی فوری تحقیقات کا مطالبہ کیا ہے عآپ کے قومی کنوینر اروند کیجریوال نے کہا، "لال قلعہ کے پاس ہوئے دھماکے کی خبر انتہائی تشویشناک ہے بتایا جا رہا ہے کہ اس میں کچھ لوگوں کی جانیں گئی ہیں، جو بہت افسوسناک ہے پولیس اور حکومت کو فوراً یہ جانچ کرنی چاہیے کہ یہ دھماکہ کیسے ہوا اور کیا اس کے پیچھے کوئی بڑی سازش تو نہیں ہے۔ دہلی کی سلامتی کے معاملے میں لاپرواہی برداشت نہیں کی جا سکتی۔"
عآپ کے سینئر رہنما سنجے سنگھ نے کہا، "ایسی گھٹیا حرکت صرف پاکستان ہی کر سکتا ہے۔ وزیر اعظم نریندر مودی نے جنگ بندی کر کے پاکستانی دہشت گردوں کا حوصلہ بڑھا دیا ہے۔ جن دہشت گردوں نے ہمارے معصوم شہریوں کی جان لی ہے، انہیں بھی موت کے گھاٹ اتارنا چاہیے۔ لال قلعہ پر حملہ ہمارے وقار اور فخر کی علامت پر حملہ ہے۔ ملک مودی کے ہاتھوں محفوظ نہیں۔ خدا مرنے والوں کی روحوں کو سکون دے۔"
عآپ رہنما منیش سسودیا نے ایکس پر لکھا، "دہلی میں ہوئے دھماکے کی خبر انتہائی تشویشناک ہے۔ میں زخمیوں کی جلد صحتیابی کی دعا کرتا ہوں اور امید کرتا ہوں کہ دہلی اور ملک کے تمام شہری محفوظ رہیں۔ ایسے وقت میں سکون اور صبر برقرار رکھنا ہی سب سے بڑی طاقت ہے، دہشت اور خوف کا جواب ہماری یکجہتی سے ہی دیا جا سکتا ہے۔"
دہلی اسمبلی میں قائدِ حزبِ اختلاف آتشی نے کہا، "لال قلعہ کے قریب ہوئے دھماکے کی خبر بہت پریشان کن ہے۔ خدا سے دعا ہے کہ کوئی جانی نقصان نہ ہوا ہو اور سب محفوظ ہوں۔ واقعے کی مکمل جانچ جلد سے جلد ہونی چاہیے تاکہ سچائی سامنے آئے اور قصورواروں کے خلاف سخت کارروائی کی جا سکے۔ دہلی کے عوام کی سلامتی ہمارے لیے سب سے اہم ہے۔"
قابلِ ذکر ہے کہ لال قلعہ میٹرو اسٹیشن کے گیٹ نمبر ایک کے قریب ایک کار میں دھماکہ ہوا، جس میں کچھ لوگوں کی جانیں گئیں جبکہ کئی زخمی ہوئے ہیں۔
یو این آئی۔ اے ایم