نئی دہلی، 10 جولائی (یو این آئی) انفورسمنٹ ڈائریکٹوریٹ (ای ڈی) نے جمعہ کو کہا کہ اس نے حال ہی میں کلانی امپیکس پرائیویٹ لمیٹڈ اور اس کے سرگرم ڈائریکٹر دھرمیش نریندر سنگھانی کے خلاف ایک تحقیقات کے سلسلے میں فارن ایکسچینج مینجمنٹ ایکٹ (فیما) کے تحت تلاشی مہم چلائی ہے، جس کے دوران ظاہرنہیں کیئے گئے غیر ملکی اثاثوں، غیر ملکی بینک کھاتوں اور مشکوک سرحد پار لین دین کے ثبوت ملے ہیں۔
ای ڈی کے مطابق، فیما کی مبینہ خلاف ورزیوں کی جاری جانچ کے ایک حصے کے طور پر 9 جولائی کو تلاشی لی گئی تھی۔ ایجنسی نے کہا کہ برآمدات سے حاصل ہونے والی رقم، جسے ہندستان واپس لانا ضروری تھا، کافی وقت گزر جانے کے باوجود وصول نہیں کی گئی تھی۔ کئی معاملوں میں، برآمدی رقم کی وصولی کے لیے مجاز ڈیلر بینک سے کوئی توسیع نہیں لی گئی تھی، اور وصولی کی کوئی دستاویزی کوششیں بھی نہیں پائی گئیں۔ جانچ سے یہ بھی انکشاف ہوا ہے کہ برآمدی ادائیگیاں مبینہ طور پر ایسے تیسرے فریق (تھرڈ پارٹی) اداروں سے حاصل کی گئی تھیں جو برآمدی انوائس اور شپنگ دستاویزات میں نامزد خریداروں یا کنسائنیز سے مختلف تھیں۔
تلاشی کے دوران، ای ڈی کے اہلکاروں کو مبینہ طور پر سنگھانی سے جڑے ظاہرنہیں کیئے گئے غیر ملکی اثاثوں اور غیر ملکی بینک کھاتوں کے ثبوت ملے۔ ایجنسی نے کہا کہ کینیڈا میں واقع ظاہرنہیں کی گئی ایک کمپنی میں سنگھانی کی کافی شیئر ہولڈنگ کا پتہ چلا ہے، جبکہ اس سے منسلک غیر ملکی بینک کھاتے اور متعلقہ لین دین کو مبینہ طور پر متعلقہ حکام کے سامنے ظاہر نہیں کیا گیا تھا۔ ای ڈی نے متحدہ عرب امارات (یو اے ای) میں بھی ظاہرنہیں کیئے گئے ایک کاروباری ادارے کی شناخت کی ہے۔ اب تک، جانچ کے دوران کینیڈا، امریکہ اور یو اے ای میں ظاہرنہیں کیئے گئے بینک کھاتوں کی شناخت کی گئی ہے۔
ایجنسی نے کہا کہ امریکہ اور برطانیہ میں کسٹمز حکام بھی سنگھانی سے جڑے کچھ لین دین کی جانچ کر رہے ہیں، جبکہ ای ڈی ان لین دین سے جڑی ممکنہ فیما کی خلاف ورزیوں کا جائزہ لے رہی ہے۔ ای ڈی نے کہا کہ مزید تفتیش جاری ہے۔
یو این آئی۔ ایف اے