نئی دہلی 16 جولائی (یو این آئی)وزیر اعظم نریندر مودی کی صدارت میں مرکزی کابینہ نے آج چھ سال کی مدت کے لیے ’ پردھان منتری دھن دھانیہ کرشی یوجنا‘کو منظوری دی اس کا آغاز 26-2025سے ہوگا ، جس میں 100 اضلاع کا احاطہ کیا جائے گا  پردھان منتری دھن دھانیہ کرشی یوجنا نیتی آیوگ کے توقعاتی اضلاع پروگرام سے تحریک یافتہ اور اپنی نوعیت کی پہلی اسکیم ہے، جوخاص طور پر زراعت اور اِس سےمتعلقہ شعبوں پر مرکوز ہے۔
اس اسکیم کا مقصد زرعی پیداوار میں اضافہ کرنا ، فصلوں کے تنوع اور پائیدار زرعی طور طریقوں کو اپنانے کے عمل میں اضافہ کرنا ، پنچایت اور بلاک کی سطح پر فصل کے بعد کے ذخیرے کو بڑھانا ، آبپاشی کی سہولتوں کو بہتر بنانا اور طویل مدتی و قلیل مدتی قرض کی دستیابی کو آسان بنانا ہے ۔ یہ ’پردھان منتری دھن دھانیہ کرشی یوجنا‘ کے تحت 100 اضلاع کو ترقی دینے کے لیے 26-2025 کے بجٹ اعلان کے مطابق ہے ۔ اس اسکیم کو 11 محکموں میں 36 موجودہ اسکیموں ، دیگر ریاستی اسکیموں اور نجی شعبے کے ساتھ مقامی شراکت داری کے ذریعے نافذ کیا جائے گا۔
100 اضلاع کی تین اہم اشاریوں یعنی کم پیداواریت، کم کاشتکاری اور کم قرض کی فراہمی کی بنیاد پر نشاندہی کی جائے گی۔ ہر ریاست/مرکز کے زیر انتظام علاقے میں اضلاع کی تعداد نیٹ کراپڈ ایریا اور آپریشنل ہولڈنگز کے حصے کی بنیاد پر طے کی جائے گی۔ تاہم ہر ریاست سے کم از کم ایک ضلع کو منتخب کیا جائے گا۔
اسکیم کی موثر منصوبہ بندی ، نفاذ اور نگرانی کے لیے ضلعی ، ریاستی اور قومی سطح پر کمیٹیاں تشکیل دی جائیں گی ۔ ’ڈسٹرکٹ دھن دھانیہ سمیتی‘ کے ذریعے ڈسٹرکٹ ایگریکلچر اینڈ الائیڈ ایکٹیویٹیز پلان کو حتمی شکل دی جائے گی ، جس میں ترقی پسند کسان بھی ممبر ہوں گے ۔ ضلع منصوبوں کو فصلوں کے تنوع ، پانی اور مٹی کی صحت کے تحفظ ، زراعت اور متعلقہ شعبوں میں خود کفالت کے ساتھ ساتھ قدرتی اور نامیاتی کاشتکاری کی توسیع کے قومی اہداف سے ہم آہنگ کیا جائے گا ۔ ہر دھن دھانیہ ضلع میں اسکیم کی پیش رفت کی ماہانہ بنیاد پر ڈیش بورڈ کے ذریعے 117 کلیدی کارکردگی کے اشاریے پر نگرانی کی جائے گی ۔ نیتی، ضلع کے منصوبوں کا جائزہ لے کر رہنمائی بھی کرے گی ۔ اس کے علاوہ ہر ضلع کے لیے مقرر کردہ مرکزی نوڈل افسران بھی باقاعدگی سے اسکیم کا جائزہ لیں گے ۔
جیسے جیسے ان 100 اضلاع میں ہدف شدہ نتائج میں بہتری آئے گی ، ملک کے لیے کارکردگی کے اہم اشاریوں کے مقابلے میں مجموعی اوسط میں اضافہ ہوگا ۔ اس اسکیم کے نتیجے میں اعلیٰ پیداواریت ، زراعت اور اس سے وابستہ شعبے میں ویلیو ایڈیشن ہوگا، مقامی سطح پر ذریعہ معاش پیدا ہوگا اور اس طرح گھریلو پیداوار میں اضافہ ہوگا اور خود کفالت (آتم نربھر بھارت) حاصل ہوگی ۔ جیسے جیسے ان 100 اضلاع کے اشاریے بہتر ہوتے جائیں گے ، قومی اشاریے خود بخود اوپر کی طرف بڑھنے لگیں گے ۔
یو این آئی۔ م ش۔ م ا