خصوصی مضمون
نئی دہلی،8 جنوری (ممتاز احمد/ یو این آئی) بہت زیادہ دنوں کی بات نہیں جب ریسرچ اسکالر،مقرر، خبر نگار اور کسی خاص موضوع پرمضامین لکھنے والوں کو کتابوں کی تلاش اور لائبریوں کے چکر لگانے پڑتے تھے اورتب کہیں جاکر وہ کسی موضوع پر کچھ اظہار خیال کرپاتے تھے، تلاش معانی کے لئے لغات کی ورق گردانی کرتے تھے لیکن آج ہم ایک اسمارٹ عہد میں سانس لے رہے ہیں اور چیٹ جی پی ٹی، کلاوڈ، جیمنی، کوپائلٹ اورمشین لرننگ وغیرہ جیسے آلات ہماری علمی اور سماجی زندگی کا حصہ بن چکے ہیں، اب لوگ مصنوعی ذہانت (اے آئی) کے طلسم کوتیزی سے اپنارہے ہیں۔ دراصل مشینوں میں سوچنے سمجھنے کی صلاحیت پیدا کرنے کو اے آئی کہاجاتا ہے۔ سادہ لفظوں میں کہا جائے تو مصنوعی ذہانت (اے آئی) مشینوں کی ان کاموں کو انجام دینے کی صلاحیت ہے، جن کے لیے عموما انسانی قوت فکر کی ضرورت ہوتی ہے۔ یہ نظام کو تجربات سے سیکھنے، نئے حالات سے ہم آہنگ کرنے اور پیچیدہ مسائل کو آزادانہ طور پر حل کرنے کے لائق بناتا ہے۔ اے آئی معلومات کا تجزیہ کرنے، نمونوں کو پہچاننے اور ردعمل پیدا کرنے کے لیے ڈیٹا سیٹس، الگورژم اور زبان کے بڑے ماڈیول کا استعمال کرتا ہے۔ وقت گزرنے کے ساتھ ساتھ اس نظام کی کارکردگی بہتر ہورہی ہے، جس سے انہیں انسانوں کی طرح استدلال کرنے، فیصلے کرنے اور ان سے بات چیت کرنے کے مواقع حاصل ہورہے ہیں۔ اے آئی ایک ایسا غیر جانبدار سامع ہے، جو جذباتی دباؤ ڈالتا ہے اور نہ اخلاقی وعظ و نصیحت کرتا ہے۔ یہ نظام مشین لرننگ اور ڈیپ لرننگ جیسی ٹیکنالوجیوں کے توسط سے کام کرتا ہے۔
فرض کریں کہ آپ کسی گنجلک موضوع کے حوالے سے پیچ وخم میں مبتلا ہیں؟یا کوئی مشورہ چاہتے ہیں تو پریشان نہ ہوں۔ اے آئی آپ کی رہنمائی کر سکتی ہے۔ پیچیدہ خیالات کو واضح کرکے خواہ وہ آئینی ترمیم ہو یا ریاضیات کا کوئی مشکل فارمولہ، اس کی تفہیم سہل ہوجاتی ہے۔ حد تو یہ ہے اے آئی آپ کے مطالعاتی نمونوں کا تجزیہ کرکے ایسے مضامین پیش کردیتا ہے، جو آپ کی پسند مطابق ہوں۔
عہد حاضر میں مشین لرننگ اور اے آئی نے پوری دنیا میں انقلاب برپا کردیا ہے۔ سچ کہا جائے تو ماہر لسانیات اس انقلاب کا مرکزی حصہ ہیں۔ ان شعبوں میں ماہر لسانیات صرف غیر فعال مبصر نہیں بلکہ سرگرم تخلیق کار ہیں، جومشینوں کو سکھاتے ہیں کہ انسان زبانوں کوکیسے سمجھیں، تشریح کریں اور تخلیق کریں۔ اس میں نیچرل لینگویج پروسیسنگ (این ایل پی) سسٹم تیار کرنے جیسے پیچیدہ امور شامل ہیں، جو کمپیوٹروں کو انسانوں کی مانند قوت گویائی اور تحریری زبان کو سمجھنے کے قابل بنا تے ہیں۔ یہ ایک جدید ترین دائرہ علم ہے، جو لسانیات، کمپیوٹر سائنس اور مصنوعی ذہانت کو باہم یکجا کرتاہے۔
ان میں سے بہت سی ایجادات کا مرکز کمپیوٹیشنل لسانیات ایک ایسا شعبہ ہے، جہاں ماہر لسانیات اور کمپیوٹر سائنس داں الگورژم تیار کرنے میں تعاون کرتے ہیں، جو کمپیوٹروں کو انسانی زبان پرکام کرنے اور تخلیق کے لائق بناتے ہیں۔ یہ نظم و ضبط سرچ انجن سے لے کر ترجمہ ایپ تک،غرض ہر چیز کی ریڑھ کی ہڈی کی حیثیت رکھتا ہے، جو ٹیکنالوجی پر ہمارا انحصار بڑھنے کے ساتھ اسے ترقی کا ایک اہم شعبہ بناتا ہے۔ کمپیوٹیشنل لسانیات میں ماہر لسانیات زبان کے ماڈل کی تخلیق میں اپنا رول ادا کرتے ہیں، زبان کیسے کام کرتی ہے، اس کی ریاضیاتی نمائندگی کرتے ہیں۔ یہ ماڈل مختلف قسم کے اطلاقات کو تقویت فراہم کرنے کے لیے استعمال کیے جاتے ہیں جیسے کہ مشین ٹرانسلیشن سسٹم (جیسے گوگل ٹرانسلیٹ)، اسپیچ ریکوگ نیشن سافٹ ویئر (جو بولے جانے والے الفاظ کو متن میں تبدیل کرتا ہے) حتی کہ مواد کی سفارش کرنے والے سرچ انجن، جو آپ کے سابقہ رویے کی بنیاد پر مضامین یا ویڈیوز تجویز کرتے ہیں۔ کمپیوٹیشنل لسانیات کے اندر ایک اور دلچسپ شعبہ آواز سے چلنے والی ٹیکنالوجیوں کی ترقی ہے۔ جیسے جیسے صوتی تلاش اور صوتی احکامات زیادہ عام ہوتے جارہے ہیں، ماہرین لسانیات کے لیے اس بات کو یقینی بنانا ضروری ہے کہ یہ سسٹم لہجے، بولیوں اور تقریر کے نمونوں کی ایک وسیع رینج کی درست تشریح اور نمائندگی کرسکیں۔ اس کے لیے صوتیات، نحو اور اصطلاحات کی گہری فہم کے ساتھ ساتھ اس علم کو الگورژم میں ترجمہ کرنے کی صلاحیت کی ضرورت ہوتی ہے، جسے مشینیں استعمال کر سکیں۔
اے آئی آلات میموری میپ کے ذریعے معلومات کو منظم اوربصریت سے ہمکنار کر کے یاد داشت کو برقرار رکھنے میں معاونت کرتے ہیں۔ یہ ٹول نمونوں کا تجزیہ کرتے ہیں کہ ہم کس طرح معلومات کو یاد کرتے ہیں اور متعامل نقشے بناتے ہیں، جو متعلقہ تصورات کو مربوط کرتے ہیں، جس سے پیچیدہ اور گنجلک موضوعات کو یاد رکھنا آسان ہوجاتا ہے۔ مضامین کو مختصر، منسلک اجزاء میں تقسیم کرکے اے آئی سے چلنے والے میموری میپ صارفین کو کلیدی تصورات کا بہ سرعت جائزہ لینے، ایسوسی ایشن کو مضبوط کرنے اور اسے طویل مدت تک برقرار رکھنے میں مدد کرتے ہیں۔ مائنڈ مسٹر یاکوگل لیوریج جیسے ٹول کنکشن تجویز کرنے اور بہتر فہم نیز نقشے کو بہتر بنانے کے لئے اے آئی سے مستفید ہوتے ہیں۔
اے آئی کی مدد سے تحریرکو نکھارنے میں مدد ملتی ہے۔ جی پی ٹی چیٹ ذہن سازی اور مضامین کی تشکیل میں مددگار ثابت ہوسکتا ہے۔ یہ جاننا بہت ضروری ہے کہ اے آئی سے چلنے والے آلات انسانوں کے ساتھ فطری اور بدیہی طریقے سے بات چیت کرنے کے لیے لسانی مہارت پر بہت زیادہ انحصار کرتے ہیں۔ ماہر لسانیات ان نظاموں کو انسانی تقریر کی باریکیوں کو پہچاننے اور جواب دینے میں مدد کرتے ہیں، جس میں لہجہ، سیاق و سباق اور یہاں تک کہ اس میں طنز بھی شامل ہے۔ ورچوئل اسسٹنٹ کے علاوہ اے آئی سے چلنے والے کسٹمر سروس چیٹ بوٹس ایک اور شعبہ ہے، جہاں لسانی مہارت بیش قیمت ہے۔ ماہرین لسانیات ان بوٹس کو صارفین کے کئی طرح کے سوالات کے جوابات دینے کے لیے ڈیزائن کرنے میں مدد کرتے ہیں، اس بات کو یقینی بناتے ہوئے کہ بات چیت نہ صرف درست بلکہ انسانوں جیسی بھی محسوس ہو۔ اس کے لیے مکالمے کے نظام، سیاق و سباق اورحتیٰ کہ جذباتی شناخت کی گہری سمجھ کی ضرورت ہوتی ہے۔ یہ سبھی وہ شعبے ہیں،جہاں لسانیات اوراے آئی باہم یکجا ہوتے ہیں۔
ہندستان کا تیار کردہ بھاشینی ایپ مصنوعی ذہانت سے چلنے والا پلیٹ فارم ہے، جو متعدد ہندوستانی زبانوں میں ترجمہ اور تقریر کے ٹول پیش کرکے زبانوں کی رکاوٹوں کو دور کرتا ہے۔ اس سے ترجمانی کے علاوہ شہریوں کو ڈیجیٹل خدمات تک آسانی سے رسائی حاصل کرنے میں مدد ملتی ہے۔ یہ 20 ہندوستانی زبانوں کو سپورٹ کرتا ہے اور 350 سے زیادہ اے آئی ماڈلز کو مربوط کرتا ہے۔ اس کے علاوہ بھارت جین اے آئی پہلا گھریلو ملٹی ماڈل ہے، جو بڑی زبان کا ماڈل تصور کیا جاتا ہے۔ یہ 22 ہندوستانی زبانوں کو سپورٹ کرتا ہے اور متن، تقریر اور تصویر کی تفہیم کو مربوط کرتا ہے۔
علاوہ ازیں، لارج لینگویج ماڈل (ایل ایل ایم) ایک جدید اے آئی سسٹم ہے، جو انسان کی طرح متن کو سمجھنے اور تیار کرنے کے لیے بڑی مقدار میں ڈیٹا سے سیکھتا ہے۔ایل ایل ایم ایسا سسٹم ہے، جو چیٹ بوٹس، ترجمہ کے ٹولز اور ورچوئل اسسٹنٹ کو ممکن بناتا ہے۔ وہ لوگوں کے لیے معلومات کی تلاش، سرکاری خدمات کا استعمال اور اپنی زبان میں نئی استعداد اورمہارتیں سیکھنا آسان بناتا ہے۔ اِن شارٹس اورپاکٹ جیسے ٹول خبروں کو فلٹر کرنے کے لئے اے آئی کا استعمال کرتے ہیں، جن کا علم ضروری ہے۔ وہ روزمرہ کی خبروں کا مختصرا خلاصہ پیش کرتے ہیں، جس سے وہ آپ کو غیر متعلقہ معلومات میں جائے بغیر حالات حاضرہ سے آگاہ کرتے رہتے ہیں۔ دلچسپ بات یہ ہے کہ اگر ا ے آئی کو پتہ چلتا ہے کہ آپ کچھ مخصوص موضوعات کی تلاش میں ہیں تو وہ یہ یقینی بناتا ہے کہ وہ آپ کی خواہشات کی تکمیل کرے۔
مختصرا مصنوعی ذہانت کے استعمال سے ہم بہت زیادہ سہل پسند ہوگئے ہیں۔ ہمارے کام کرنے کے طریقوں میں بہت آسانیاں پیدا ہوگئی ہیں۔ ہم بلاجھجھک اور بڑی خندہ پیشانی کے ساتھ اس کا استعمال کررہے ہیں۔ ایک حد تک تو اس کا استعمال بجا ہے لیکن اس پر انحصار سے گریز کرنا چاہئے۔ اس سے انسانی اذہان کے کند ہونے کا خطرہ ہے۔ بصورت دیگر ہم اے آئی کے غلام بن کر رہ جائیں گے اور ہماری تخلیقی صلاحیت پر منفی اثر پڑے گا۔ جو چیز انسانی تخلیقی صلاحیتوں کو منفردو مخصوص بناتی ہے، وہ غیر معقول چھلانگ لگانے کی ہماری صلاحیت یا جبلی انداز ہے، یہ ایک ایسی چیز ہے، جس کی نقل تیار کرنا یا اس کا توڑ کرنا اے آئی کے لئے مشکل ہے۔آئے دن ہم دیکھتے ہیں کہ مصنوعی ذہانت پر مکمل انحصار کرنے سے چند ایسی اغلاط سرزد ہوجاتی ہیں ، جس سے ہمیں خجالت اور شرمندگی کا سامنا کرنا پڑتا ہے ۔ یہ بات ذہن نشیں کرلینی چاہئے کہ ہم مصنوعی ذہانت کے شعبے میں خواہ کتنی ہی ترقی کیوں نہ کرلیں، اس کا انسانی اذہان سے مقابلہ نہیں کیاجاسکتا۔ ذہن انسانی کی بالادستی اور اس کی اہمیت بہرحال برقرار رہے گی۔
یو این آئی۔ م الف