نئی دہلی، 13 فروری (یو این آئی) عام آدمی پارٹی (اے اے پی) کے سینئر لیڈر اور دہلی کے کارگذار وزیر اعلیٰ آتشی نے جمعرات کو کہا کہ جیسے ہی آپ کی حکومت ہٹائی گئی، دہلی میں بجلی کی طویل کٹوتی شروع ہو گئی ہے محترمہ آتشی نے آج یہاں ایک پریس کانفرنس میں کہا کہ 8 فروری سے دہلی کے مختلف علاقوں سے مسلسل بجلی کی کٹوتی کی شکایتیں سوشل میڈیا پر آ رہی ہیں۔ 9 فروری کو موہن گارڈن کے سینک انکلیو میں چار گھنٹے تک بجلی بند رہی۔ 8 فروری کو آشرم میں واقع سن لائٹ کالونی میں رات بھر بجلی بند رہی۔ 10 فروری کو مشرقی دہلی کے رادھے پور میں دو گھنٹے تک بجلی منقطع رہی اور کئی دوسرے علاقوں میں بھی بجلی کٹنے کی شکایات موصول ہوئیں۔
اے اے پی لیڈر نے کہا کہ جب 1993 سے 1998 تک دہلی میں بی جے پی کی حکومت تھی تب بھی پاور سیکٹر کا برا حال تھا۔ آج 20 ریاستوں میں بھارتیہ جنتا پارٹی (بی جے پی) کی حکومت ہے اور ان تمام ریاستوں میں بجلی کی حالت یکساں ہے۔ یہ بہت افسوسناک ہے کہ الیکشن جیتنے کے بعد بی جے پی اب دہلی کو اتر پردیش میں تبدیل کر رہی ہے۔
انہوں نے کہا کہ 8 فروری کو ہی گنتی کے وقت ان لوگوں نے وزراء کے دفاتر کو تالے لگانے کے احکامات جاری کیے تھے۔ وزراء اور ان کے عملے کو سیکرٹریٹ میں داخل ہونے کی اجازت نہیں ہونی چاہئے، انہیں کوئی کاغذ یا فائل دیکھنے کی اجازت نہیں ہونی چاہئے۔ اس لیے یہ بالکل واضح ہے کہ بی جے پی خود 8 فروری سے دہلی کی حکومت چلا رہی ہے اور دہلی کے لوگ تین دن کے اندر اس کے نتائج دیکھ رہے ہیں۔ صرف تین دنوں میں بجلی کٹنے کی 40 سے زائد شکایات موصول ہوئی ہیں۔
یواین آئی۔ ظ ا