NationalPosted at: Jan 19 2025 4:00PM چھوٹے شہروں میں آدھے سے زیادہ اسٹارٹ اپ کی قیادت بیٹیاں کر رہی ہیں: مودی

نئی دہلی، 19 جنوری (یو این آئی) وزیر اعظم نریندر مودی نے آج کہا کہ ناگالینڈ جیسی ریاست میں گزشتہ سال اسٹارٹ اپس کے رجسٹریشن میں 200 فیصد اضافہ ہوا ہے اور چھوٹے شہروں میں آدھے سے زیادہ اسٹارٹ اپ کی قیادت بیٹیاں کررہی ہیں۔
مسغٹر مودی نے آل انڈیا ریڈیو پر نشر ہونے والے اپنے ماہانہ پروگرام "من کی بات" میں کہا کہ اسٹارٹ اپ انڈیا نے چند دن پہلے ہی نو سال مکمل کر لیے ہیں۔ نو سالوں میں بنائے گئے آدھے سے زیادہ اسٹارٹ اپ ٹائر 2 اور ٹائر 3 شہروں سے ہیں۔ اس کا مطلب ہے کہ ہمارا اسٹارٹ اپ کلچر صرف بڑے شہروں تک محدود نہیں ہے۔ انبالہ، حصار، کانگڑا، چنگل پٹو، بلاس پور، گوالیار اور واشیم جیسے شہر اسٹارٹ اپ کے مرکز بن رہے ہیں۔ ویسٹ مینجمنٹ، غیر قابل تجدید توانائی، بائیو ٹیکنالوجی اور لاجسٹکس وہ شعبے ہیں جہاں اسٹارٹ اپ سب سے زیادہ دیکھے جا رہے ہیں۔ یہ روایتی شعبے نہیں ہیں لیکن ہمارے نوجوان بھی روایت سے آگے سوچتے ہیں، اسی وجہ سے انہیں کامیابیاں مل رہی ہیں۔
انہوں نے کہا کہ 10 سال پہلے جب کوئی اسٹارٹ اپ کے شعبے میں جانے کی بات کرتا تھا تو اسے ہر طرح کے طعنے سننے پڑتے تھے۔ کوئی پوچھتا تھا کہ اسٹارٹ اپ کیا ہے؟ تو کوئی کہتا تھا کہ اس سے کچھ نہیں ہونے والا۔ لیکن اب دیکھیں ایک دہائی میں کتنی تبدیلی آئی ہے۔ آپ کو بھی ہندوستان میں پیدا ہونے والے نئے مواقع سے بھرپور فائدہ اٹھانا چاہیے۔ اگر آپ خود پر یقین رکھتے ہیں تو آپ کے خواب بھی نئی اڑان بھریں گے۔
یواین آئی۔ ظ ا