سری نگر،4 نومبر (یو این آئی) نیشنل کانفرنس کے سینئر لیڈر اور سابق وزیر خزانہ عبدالرحیم راتھر کو پیر کے روز جموں وکشمیر اسمبلی کا اسپیکر منتخب کیا گیا۔
مسٹر راتھر کو اسمبلی کے پہلے اجلاس میں صوتی ووٹ کے ذریعے اسپیکر منتخب کیا گیا جب اپوزیشن جماعتوں نے اس عہدے کے لیے مقابلہ نہ کرنے کا فیصلہ کیا۔
وزیر زراعت جاوید احمد ڈار نے اسپیکر کے عہدے کے لیے مسٹر راتھر کے نام کی تحریک پیش کی جبکہ نیشنل کانفرنس کے رکن اسمبلی رامبن ارجن سنگھ راجو نے پانچ روزہ اجلاس کے پہلے دن اس تحریک کی حمایت کی۔
دریں اثنا وزیر اعلیٰ عمر عبداللہ، پوٹم اسپیکر مبارک گل اور اپوزیشن لیڈر سنیل شرما نے عبدالرحیم راتھر کو اسپیکر منتخب ہونے پر مبارکباد پیش کی۔
بتادیں کہ جموں وکشمیر اسمبلی کا پہلا اجلاس پیر کی صبح یہاں سخت سیکورٹی بند وبست کے بیچ شروع ہوا۔
عبدالرحیم راتھر کا تعلق وسطی کشمیر کے ضلع بڈگام کے قصبہ چاڈورہ کے بانڈی پورہ گائوں سے ہے جہاں وہ سال1944 میں پیدا ہوئے۔
سات بار رکن اسمبلی رہنے والے مسٹر راتھر چرار شریف اسمبلی نشست کی نمائندگی کر رہے ہیں۔
وہ اس سے قبل بھی جموں وکشمیر اسمبلی کے اسپیکر رہے ہیں جبکہ انہوں نے سال2002 سے2008 تک پی ڈی پی اور کانگریس کی مخلوط سرکار کے دوران لیڈر آف اپوزیشن کی حیثیت سے خدمات انجام دی ہیں۔
علاوہ ازیں نیشنل کانفرنس کی حکومت کے دوران مسٹر راتھر نے خزانہ سمیت کئی اہم وازارتوں کے قلم داں سنبھالے ہیں۔
انہوں نے کشمیر یونیورٹی سے سال1968 میں پولیٹکل سائنس میں پوسٹ گریجویشن کرنے کے بعد علی گڑھ یونیورسٹی سے سال 1971 میں ایل ایل بی کی ڈگری حاصل کی۔
نیشنل کانفرنس میں شرکت کرنے کے بعد مسٹر راتھر نے سال1977 کے اسمبلی انتخابات میں حصہ لے کر چرار شریف نشست سے کامیابی کا جھنڈا گاڑا۔
بعد ازاں انہوں نے مسلسل سال 1983،1987،1996، 2002 اور 2008 کے انتخابات میں کامیابی حاصل کی تاہم سال2014 کے انتخابات میں پی ڈی پی کے غلام نبی لون نے ان کو ہرا دیا جس کے نتیجے میں اس نشست پر ان کا تین دہائیوں کا راج ختم ہوا۔
حالیہ اسمبلی انتخابات میں مسٹر راتھر نے ایک بار پھر ر کامیابی حاصل کرکے چرار شریف سیٹ ساتویں بار اپنے نام کر دی۔

یو این آئی - ایم افضل