NationalPosted at: Jan 25 2025 11:23PM کھلاڑیوں نے تاریخی کارنامہ انجام دے کر ملک کا سر فخر سے بلند کیا: مرمو

نئی دہلی، 25 جنوری (یو این آئی) صدر جمہوریہ ہند دروپدی مرمو نے ہفتہ کو یوم جمہوریہ کے موقع پر آل انڈیا ریڈیو اور دوردرشن پر نشر ہونے والے ملک سے اپنے خطاب میں کھلاڑیوں کی کامیابیوں اور اولمپک اور پیرا اولمپک کھیلوں سمیت دیگر مقابلوں میں ان کی شاندار کارکردگی کا ذکر کیا۔
انہوں نے مزید کہا کہ ’’ایک قوم کی حیثیت سے ہمارا بڑھتا ہوا اعتماد، کھیل کے میدان میں بھی نظر آرہا ہے۔ ہمارے کھلاڑیوں نے کامیابی کےروشن باب رقم کیے ہیں۔ گذشتہ سال ہمارے کھلاڑیوں نے اولمپک گیمز میں اچھی کارکردگی کا مظاہرہ کیا۔ پیرا لمپک گیمز میں، ہم نے اپنا اب تک کا سب سے بڑا دستہ بھیجا، جس نے اپنی بہترین کارکردگی کا مظاہرہ کیا۔ ہمارے کھلاڑیوں نے ایف آئی ڈی ا ی شطرنج اولمپیاڈ میں اپنی کارکردگی سے عالمی برادری کو متاثر کیا اور مرد اور خواتین کھلاڑیوں نے گولڈ میڈل جیتے۔ سال 2024 میں، ڈی گوکیش نے اب تک کا سب سے کم عمر عالمی چیمپئن بن کر تاریخ رقم کی۔‘‘
محترمہ مرموں نے کہا کہ ’’ ملک بھر میں زمینی سطح پر تربیتی سہولیات میں کافی بہتری آئی ہے اور اِس کے دم پر ہمارے ایتھلیٹس نے جیت حاصل کر کے ہمیں فخر کرنے کا موقع فراہم کیا ہے ۔ ساتھ ہی انہوں نے آنے والی نسلوں کو اوربھی اعلیٰ مقاصد حاصل کرنے کی ترغیب دی ہے۔‘‘
یو این آئی۔ این یو۔